இஸ்ரேலுக்குள் புதிய இலக்கு தாக்குதல் அச்சம் புதிய தாக்குதல்கள் நிகழக்கூடும் என்ற அச்சம் நிலவி வரும் நிலையில், இஸ்ரேலுக்குள் தாக்குதல் நடத்துவதற்கான புதிய இலக்குகளின் பட்டியலை ஈரான் தயாரித்துள்ளதாக தகவல் வெளியாகியுள்ளது.இஸ்ரேலியத் தாக்குதல்கள் மீண்டும் இடம்பெற்றால், இதுவரை குறிவைக்கப்படாத புதிய இலக்குகள் மீது தாக்குதல் நடத்துவதற்கான திட்டங்கள் தயாராக உள்ளதாக ஈரானிய பாதுகாப்பு வட்டாரம் ஒன்று தெரிவித்துள்ளது.இந்த புதிய இலக்குகள், பல ஆண்டுகளாகப் பழுதுபார்க்கவோ அல்லது மீண்டும் கட்டியெழுப்பவோ முடியாத வகையில் தேர்ந்தெடுக்கப்பட்டுள்ளதாகவும், அவற்றைத் தாக்குவதன் மூலம் “இஸ்ரேலில் இருந்து மக்கள் வெளியேறுவதை விரைவுபடுத்த முடியும்” என்றும் அந்த வட்டாரம் தெரிவித்ததாகக் கூறப்படுகிறது.ஈரானில் உள்ள ஷாஹித் அலிமொஹம்மதி தளம் தொடர்பாக பதற்றம் அதிகரித்து வரும் நிலையில் இந்த எச்சரிக்கை வெளியாகியுள்ளது. ஆங்கில மொழி அறிக்கைகளில் இந்தத் தளம் “Pickaxe Mountain” என குறிப்பிடப்படுகிறது.நடன்ஸ் அணுசக்தி வளாகத்திலிருந்து சுமார் 2 கிலோமீட்டர் தொலைவில் அமைந்துள்ள இந்தத் தளம், தற்போது கட்டுமானத்தில் இருந்தாலும், மலைக்குள் ஆழமாக அமைக்கப்பட்டுள்ள சுரங்கங்கள் மற்றும் பாதுகாப்பு கட்டமைப்புகளைக் கொண்டதாகக் கூறப்படுகிறது. இதனால், ஈரானின் மிகவும் பலப்படுத்தப்பட்ட அணுசக்தி தளங்களில் ஒன்றாக இது கருதப்படுகிறது.இந்தத் தளத்தின் மீது தாக்குதல் நடத்தப்பட்டால், அதில் இஸ்ரேலின் நேரடி பங்களிப்பு இல்லாவிட்டாலும் கூட, இஸ்ரேலுக்கு எதிராக ஈரான் பதிலடி கொடுக்கக்கூடும் என ஈரானிய வட்டாரங்கள் எச்சரித்துள்ளன.