மின்சாரக் கட்டண உயர்வுக்கு எதிராக இலங்கை மின்சார சபை புதிய ஊழியர் சங்கத்தின் ஊடகவியலாளர் சந்திப்பு ய சுமையைத் சுமத்தும் வகையில், மிகக் குறுகிய காலப்பகுதிக்குள் மூன்றாவது முறையாகவும் அதிகரிக்கப்பட்டுள்ள மின்சாரக் கட்டண உயர்வுக்கு எதிர்ப்புத் தெரிவித்து, இலங்கை மின்சார சபையின் புதிய ஊழியர் சங்கம் இன்று கொழும்பில் விசேட ஊடகவியலாளர் சந்திப்பொன்றை நடத்தியது. அங்கு உரையாற்றிய இலங்கை மின்சார சபையின் புதிய ஊழியர் சங்கத்தின் பொதுச் செயலாளர் பிரியந்த விக்ரமசிங்க, தற்போதைய அரசாங்கம் ஆட்சிக்கு வருவதற்கு முன்னர் மின்சாரக் கட்டணத்தை மூன்றில் ஒரு பங்காகக் குறைப்பதாகப் போலி வாக்குறுதி அளித்திருந்த போதிலும், தற்போது அதற்கு நேர்மாறான காரியங்களையே செய்து வருவதாகக் குற்றம் சாட்டினார். போட்டித்தன்மையை உருவாக்குவதற்காக ஆறு அரச நிறுவனங்களை அமைத்து மின்சாரக் கட்டணத்தைக் குறைப்பதாக அரசாங்கம் அறிவித்திருந்த போதிலும், தற்போது மக்களை மேலும் நெருக்கடிக்குள் தள்ளும் வகையிலேயே கட்டணங்கள் தொடர்ந்து அதிகரிக்கப்பட்டு வருவதாக அவர் சுட்டிக்காட்டினார்.தொடர்ந்து கருத்து வெளியிட்ட பொதுச் செயலாளர் பிரியந்த விக்ரமசிங்க, எதிர்வரும் செப்டம்பர் மாதம் வரை மின்சாரக் கட்டணம் அதிகரிக்கப்பட மாட்டாது என்றும், அமைச்சினால் அதற்கான கோரிக்கைகள் எதுவும் முன்வைக்கப்படவில்லை என்றும் அநுர குமார திஸாநாயக்க தெரிவித்திருந்த போதிலும், இந்த புதிய கட்டண உயர்வின் மூலம் அமைச்சினாலேயே இதற்கான கோரிக்கைகள் விடுக்கப்பட்டுள்ளமை தெளிவாகிறது என்றார். மின்சார சபையினால் சுமார் 600 கோடி ரூபாய் அபராதப் பணம் திரட்டப்பட்டுள்ள போதிலும், புதிய கட்டணத் திருத்தத்தின் போது அந்தத் தொகையை மக்களுக்குப் நிவாரணமாக வழங்குவதற்குப் பயன்படுத்தாமை குறித்தும் அவர் இங்கு கேள்வி எழுப்பினார்.இந்தக் கட்டண உயர்வு காரணமாக இந்நாட்டின் நடுத்தர வர்க்கத்தைச் சேர்ந்த சுமார் 35 இலட்சத்திற்கும் அதிகமான உள்நாட்டு நுகர்வோர் நேரடியாகப் பாதிக்கப்படுகின்றனர் எனத் தெரிவித்த அவர், குறிப்பாக கொழும்பில் கிருலப்பனை, கிருலப்புற, நாகஸ்வத்தை, டொரிங்டன் வத்த மற்றும் ஹேட்டேவத்த போன்ற பகுதிகளில் இரண்டு அல்லது மூன்று பேர்ச்சஸ் சிறிய காணித் துண்டுகளில் அடுக்குமாடி வீடுகளை அமைத்துக்கொண்டு, தனித்தனியாக மீட்டர்களைப் பெற்றுக்கொள்ள முடியாமல் ஒற்றை மீட்டரின் கீழ் மின்சாரத்தைப் பயன்படுத்தும் குறைந்த வருமானம் பெறும் மக்களுக்கு, இதனால் வாழவே முடியாத நிலை ஏற்படும் என விசனம் தெரிவித்தார்.அதேவேளை, பொதுப் பயன்பாடு மற்றும் வணிகத் துறையைச் சேர்ந்த 8 இலட்சத்திற்கும் அதிகமான நுகர்வோரையும் இந்த விலை உயர்வு நேரடியாகப் பாதிக்கும் என எச்சரித்த அவர், இதற்கு முன்னர் 47 இலட்சம் ரூபாயாக இருந்த ஒரு வணிக மின்சாரக் கட்டணம் புதிய திருத்தத்தின் மூலம் 56 இலட்சம் ரூபாயாகவும், 3 கோடி 95 இலட்சமாக இருந்த மற்றுமொரு கட்டணம் 4 கோடி 85 இலட்சம் ரூபாயாகவும் அதிகரித்துள்ளதாகக் குறிப்பிட்டதுடன், இந்த உற்பத்திப் செலவு இறுதியாக நுகர்வோர் மீதே சுமத்தப்படும் எனவும் சுட்டிக்காட்டினார். மேலும், அம்பத்தலே நீர் சுத்திகரிப்பு நிலையம் மாத்திரம் மாதாந்தம் சுமார் 8 இலட்சம் மின் அலகுகளைப் பயன்படுத்துவதால், இந்த மின்சாரக் கட்டண உயர்வு காரணமாக எதிர்வரும் ஜூன் 30ஆம் திகதியளவில் நீர் விநியோகக் கட்டணத்தையும் திருத்தியமைக்க நீர் வழங்கல் சபைக்கு நேரிடும் என்றும், அதுவும் மக்களுக்குத் தாங்க முடியாத சுமையாக மாறும் என்றும் அவர் தெரிவித்தார்.டொலரின் மதிப்பு 331 ரூபாய் எல்லையை எட்டி, ரூபாயின் மதிப்பும் மக்களின் வாங்கும் திறனும் மேலும் வீழ்ச்சியடைந்து வரும் இவ்வாறானதொரு பின்னணியில், எரிபொருள், நீர் மற்றும் மின்சாரம் போன்ற அத்தியாவசிய சேவைகள் அனைத்தையும் இவ்வாறு அசாதாரண முறையில் அதிகரிப்பதன் மூலம் நாட்டின் பொருளாதாரம் முழுமையாக வீழ்ச்சியடையும் என பிரியந்த விக்ரமசிங்க எச்சரித்தார். அரசாங்கத்திற்குள் பேராசிரியர்கள் மற்றும் பொருளாதார நிபுணர்கள் பலர் இருந்தபோதிலும், இந்த ஒட்டுமொத்தச் செயல்பாட்டினால் பொருளாதாரத்திற்கு ஏற்படும் பேரழிவு குறித்து அறிவுரை வழங்க எவரும் இல்லையா என்ற பலத்த கேள்வியுடன் அவர் ஊடகவியலாளர் சந்திப்பை நிறைவு செய்தார்.