வெடித்து சிதறிய இராணுவத் தளம் லா பாஸ் நகருக்கு அருகிலுள்ள வியாச்சா பகுதியில் அமைந்துள்ள இராணுவத் தளத்தில் ஏற்பட்ட பயங்கர வெடிவிபத்தில் குறைந்தது 10 பேர் உயிரிழந்துள்ளதுடன், 62 பேர் காயமடைந்துள்ளனர்.வெள்ளிக்கிழமை பிற்பகல் சுமார் 2.30 மணியளவில், வியாச்சாவில் உள்ள RAM-2 “Bolívar” இராணுவ வளாகத்தில் பைரோடெக்னிக் பொருட்கள் மற்றும் பட்டாசுகள் சேமித்து வைக்கப்பட்டிருந்த பகுதியில் இந்த வெடிப்பு ஏற்பட்டதாக அதிகாரிகள் தெரிவித்துள்ளனர்.வெடிப்பின் தாக்கம் மிகவும் கடுமையாக இருந்ததால், இராணுவ வளாகத்தில் உள்ள கட்டிடங்கள் மட்டுமின்றி அருகிலுள்ள வீடுகளும் சேதமடைந்துள்ளன. பல வீடுகளின் ஜன்னல்கள் வெடித்துச் சிதறியதாகவும் தெரிவிக்கப்பட்டுள்ளது.சம்பவத்துக்குப் பின்னர் ஆரம்பத்தில் 2 பேர் உயிரிழந்ததாகவும் 59 பேர் காயமடைந்ததாகவும் தகவல்கள் வெளியான நிலையில், பின்னர் உயிரிழப்பு 10 ஆகவும், காயமடைந்தோர் எண்ணிக்கை 62 ஆகவும் அதிகரித்துள்ளது. காயமடைந்தவர்களில் சிலர் மேலதிக சிகிச்சைக்காக லா பாஸ் நகர மருத்துவமனைகளுக்கு மாற்றப்பட்டுள்ளனர்.வெடிவிபத்தைத் தொடர்ந்து தீயணைப்பு வீரர்கள், ஆம்புலன்ஸ் குழுவினர் மற்றும் மீட்புப் பணியாளர்கள் சம்பவ இடத்தில் மீட்புப் பணிகளில் ஈடுபட்டுள்ளனர்.வெடிப்பு ஏற்பட்ட பகுதியில் இன்னும் அதிக வெப்பம் காணப்படுவதால், மீண்டும் வெடிப்பு ஏற்படும் அபாயம் இருப்பதாக அதிகாரிகள் எச்சரித்துள்ளனர். இதனால் பொதுமக்கள் சம்பவ இடத்திலிருந்து குறைந்தது 150 மீட்டர் தொலைவில் இருக்குமாறு அறிவுறுத்தப்பட்டுள்ளனர்.வெடிப்பு எவ்வாறு ஏற்பட்டது என்பது குறித்து விசாரணை நடைபெற்று வருகிறது. பைரோடெக்னிக் பொருட்கள் சேமிக்கப்பட்டிருந்த பகுதியிலேயே வெடிப்பு ஏற்பட்டது உறுதி செய்யப்பட்டுள்ள நிலையில், விபத்துக்கான துல்லியமான காரணம் இதுவரை தெரியவில்லை.இராணுவத் தளத்திலேயே ஏற்பட்ட இந்த பயங்கர வெடிவிபத்து, வியாச்சா நகர மக்களிடையே பெரும் அதிர்ச்சியை ஏற்படுத்தியுள்ளது. உயிரிழப்பு மற்றும் காயமடைந்தோர் எண்ணிக்கை மேலும் மாறக்கூடும் என்பதால், அதிகாரிகளின் அடுத்தடுத்த அறிவிப்புகள் எதிர்பார்க்கப்படுகின்றன.