உயிரிழந்த மாலுமிகளின் உடல்களை தருமாறு ஈரான் கோரிக்கை;யுத்த சூழ்நிலையால் உடன்வழங்க முடியாது அமெரிக்காவின் நீர்மூழ்கிக் கப்பலால் தாக்கப்பட்ட   ஈரான்  கப்பலில்   உயிரிழந்த  மாலுமிகளின் அனைத்து உடல்களையும் இறுதிச் சடங்குகளுக்காக  ஈரானுக்கு வழங்குமாறு கோரிக்கை விடுக்கப்பட்டுள்ளது. கப்பல்  மூழ்கியதில்  கிட்டத்தட்ட 90 மாலுமிகளின் உடல்கள் கராபிட்டியவில் உள்ள தேசிய மருத்துவமனைக்கு கொண்டு வரப்பட்டுள்ளதாக அதிகாரிகள் தெரிவித்தனர்.ஏற்பாடுகள் செய்யப்படும் வரை, உடல்கள் மருத்துவமனை குளிர் அறைகளில் சேமிக்கப்படும் என்று தெரிவிக்கப்பட்டது.உடல்களை திருப்பி அனுப்புமாறு ஈரான்  கோரியுள்ளதாகவும், ஆனால் தற்போதைய இராணுவ நிலைமை காரணமாக இந்த செயல்முறை உடனடியாக நடக்க முடியாது என்றும்  பிரதி  சுகாதார அமைச்சர் ஹன்சகா விஜேமுனி தெரிவித்தார்.இது தொடர்பில் அவர் மேலும் தெரிவிக்கையில், நேற்று இரவுக்குள் கராபிட்டியவில் கிட்டத்தட்ட 90 உடல்கள் கிடைத்ததாகவும், எண்ணிக்கை அதிகரிக்கக்கூடும்.இலங்கை நிலையான பிரேத பரிசோதனை நடைமுறைகளை மேற்கொண்டு வருகிறது. மேலும் அடுத்த கட்ட நடவடிக்கைகளில் ஈரானிய அதிகாரிகளுடன் ஒருங்கிணைந்து செயல்படுகிறது.இலங்கையில் தற்போது இவ்வளவு பெரிய எண்ணிக்கையிலான உடல்களை நீண்ட காலத்திற்கு சேமித்து வைக்க போதுமான குளிர்பதன சேமிப்பு வசதி இல்லை. இதனால் அதிகாரிகள் கூடுதல் குளிர்பதன அலகுகளை வாங்கத் தொடங்க வேண்டியுள்ளது எனத் தெரிவித்தார். IRIS Dena  கப்பல் இலங்கைக்கு அருகிலுள்ள சர்வதேச கடலில் நேற்று  அதிகாலை 5.08 மணியளவில் மூழ்கியது. தகவலையடுத்து இலங்கை கடற்படையினரும், விமானப்படையினரும் சென்று ஈரான் கப்பலில் உள்ளவர்களை மீட்கும் பணியில் ஈடுபட்டதுடன்  இதன்போது 32 கடற்படையினரை  உயிருடன் மீட்டனர்.  அவர்கள் இப்போது கராபிட்டிய தேசிய மருத்துவமனையில் சிகிச்சை பெற்று வருகின்றனர். சிகிச்சை பெறும்  ஈரான் கடற்படையினரின் பாதுகாப்பிற்காக  மருத்துவமனையில் பாதுகாப்பு பலப்படுத்தப்பட்டுள்ளமை குறிப்பிடத்தக்கது.