ஈரான் வான்வெளி முற்றிலும் காலி-டிரம்ப் அவசர ஆலோசனை வளைகுடா பகுதியில் அமைதிக்கான இராஜதந்திரப் பேச்சுவார்த்தைகள் இறுதி கட்டத்தை எட்டியுள்ளதாகக் கூறப்பட்ட நிலையில், அமெரிக்கா மற்றும் ஈரான் இடையேயான உறவு முற்றிலும் முறிந்து, போர் தொடங்குவதற்கான இறுதி மணி அடித்துள்ளது.உலகளாவிய விமானப் போக்குவரத்து கண்காணிப்புத் தரவுகளின்படி (Flightradar24), ஈரான் நாட்டின் வான்வெளி (Airspace) வணிக மற்றும் சிவிலியன் விமானப் போக்குவரத்து ஏதுமின்றி முற்றிலும் காலியாகியுள்ளது. வளைகுடா பகுதி முழுவதிலும் ஜிபிஎஸ் மற்றும் மின்னணு வழிசெலுத்தல் கருவிகள் (Navigation Spoofing) அதிரடியாகச் செயலிழக்கச் செய்யப்பட்டுள்ளதால், ஏதேனும் பெரிய வான்வழித் தாக்குதல் நடக்கக்கூடும் என்ற அச்சத்தில் சர்வதேச ஏர்லைன்ஸ் நிறுவனங்கள் ஈரானிய வான்பரப்பை முற்றிலுமாகத் தவிர்த்து வருகின்றன. கடந்த பிப்ரவரியில் உச்சகட்ட வான்வழித் தாக்குதல் நடப்பதற்கு முன்னரும் இதேபோன்ற சூழல் நிலவியது குறிப்பிடத்தக்கது.அமெரிக்காவின் முன்னணி ஊடகமான சிபிஎஸ் நியூஸ் (CBS News), அமெரிக்க ராணுவத்தின் ரகசிய நகர்வுகள் குறித்து அதிர்ச்சியூட்டும் விபரங்களை வெளியிட்டுள்ளது:வார இறுதி மெமோரியல் டே (Memorial Day) விடுமுறையைக் கழிப்பதற்காகத் திட்டமிட்டிருந்த அமெரிக்க ராணுவம் மற்றும் உளவுத்துறை (Intelligence Chiefs) உயர் அதிகாரிகளின் விடுமுறைகள் அதிரடியாக ரத்து செய்யப்பட்டுள்ளன.வெளிநாடுகளில் உள்ள அமெரிக்க ராணுவத் தளங்களில் (Overseas Bases) உள்ள வீரர்களை உடனடியாகத் திரும்ப அழைப்பதற்கான 'ரீகால்' (Recall) பட்டியல்கள் புதுப்பிக்கப்பட்டு வருகின்றன. ஈரான் மீது புதிய வான்வழித் தாக்குதல்களை நடத்துவதற்கான திட்டமிடலில் அமெரிக்கப் பாதுகாப்புத் தலைமையகமான பென்டகன் தீவிரமாக ஈடுபட்டுள்ளதாக சிபிஎஸ் வட்டாரங்கள் உறுதிப்படுத்தியுள்ளன.