குழந்தையைப் பெற்றெடுத்த தந்தை-உலகையையே வாயடைக்க வைத்த தம்பதியினர் “கர்ப்பமாக இருந்தவர் தந்தை… ஆனால் குழந்தையின் உயிரியல் தாய்” – ஈக்வடாரில் பல ஆண்டுகளுக்கு முன்பு நடந்த இந்தச் சம்பவம், குடும்பம் மற்றும் பெற்றோர் குறித்த வழக்கமான புரிதல்களையே கேள்விக்குள்ளாக்கியது.வெனிசுலாவில் பிறந்த ஃபெர்னாண்டோ மச்சாடோ மற்றும் ஈக்வடாரைச் சேர்ந்த திருநங்கை சமூக செயற்பாட்டாளர் டயான் ரோட்ரிக்ஸ் ஆகியோர் 2013ஆம் ஆண்டு சமூக வலைத்தளம் மூலம் அறிமுகமாகி காதலித்து வந்தனர்.இருவரும் தங்களது பாலின அடையாளத்தை மாற்றி வாழ்ந்தாலும், பாலின மாற்று அறுவைச் சிகிச்சைகளை மேற்கொள்ளவில்லை. இதனால், அவர்களின் உயிரியல் ரீதியான இனப்பெருக்கத் திறன் தொடர்ந்திருந்தது.இதன் பின்னர், 2015ஆம் ஆண்டு இந்தத் தம்பதி குழந்தையை எதிர்பார்ப்பதாக அறிவித்தனர். இந்த அறிவிப்பு சர்வதேச ஊடகங்களில் பெரும் கவனத்தைப் பெற்றது.பிறப்பால் ஆணாகப் பிறந்த டயான், குழந்தைக்குத் தேவையான விந்தணுவை வழங்கினார். பிறப்பால் பெண்ணாகப் பிறந்த ஃபெர்னாண்டோ கருவைச் சுமந்து குழந்தையைப் பெற்றெடுத்தார்.இதனால், ஆணாக அடையாளப்படுத்திக் கொண்டிருந்த ஃபெர்னாண்டோவே குழந்தையை கருவில் சுமந்து பெற்றெடுத்தார்.அவர்களின் மகன் 2016ஆம் ஆண்டு பிறந்தான். அவனுக்கு அன்பாக ‘கரோட்’ என்ற செல்லப்பெயரும் சூட்டப்பட்டது.இந்தத் தம்பதி, இந்த முறையில் குழந்தை பெற்றெடுத்த பகிரங்கமாக ஆவணப்படுத்தப்பட்ட முதல் திருநர் தம்பதிகளில் ஒருவராக சர்வதேச அளவில் கவனம் பெற்றனர். அவர்களின் கதை BBC, Associated Press உள்ளிட்ட சர்வதேச ஊடகங்களிலும் வெளியாகி பெரும் விவாதத்தை ஏற்படுத்தியது.குறிப்பாக, ரோமன் கத்தோலிக்கப் பின்னணி வலுவாகக் கொண்ட ஈக்வடாரில் இந்தச் சம்பவம் நடைபெற்றதால், இது சமூக அளவில் கூடுதல் கவனத்தைப் பெற்றது.தங்களது வாழ்க்கையை வெளிப்படையாகப் பகிர்ந்ததன் மூலம், திருநர்களைப் பற்றிய சமூகத்தின் பார்வையில் மாற்றத்தை ஏற்படுத்த முடியும் என்று இந்தத் தம்பதி நம்பினர்.இதற்கிடையில், டயான் ரோட்ரிக்ஸ் சமூக செயற்பாட்டிலிருந்து அரசியலுக்கும் சென்றார். 2017ஆம் ஆண்டு ஈக்வடார் தேசிய சட்டமன்றத்திற்குத் தேர்ந்தெடுக்கப்பட்ட முதல் திருநர்களில் ஒருவராக அவர் வரலாற்றில் இடம்பிடித்தார்.இந்தக் குடும்பத்தின் பயணமும் அத்துடன் முடிவடையவில்லை. 2021ஆம் ஆண்டு இவர்களுக்கு இரண்டாவது குழந்தையும் பிறந்ததாக தகவல்கள் வெளியாகின.ஃபெர்னாண்டோ மற்றும் டயானின் கதை, ஒரு குழந்தையின் பிறப்பைத் தாண்டி,  பாலின அடையாளம் மற்றும் குடும்பம் குறித்த சமூகத்தின் வழக்கமான வரையறைகள் குறித்து உலகம் முழுவதும் விவாதத்தை ஏற்படுத்தியது.ஒருவர் தன்னை எந்தப் பாலினமாக அடையாளப்படுத்திக் கொள்கிறார் என்பதையும், அவருடைய உயிரியல் இனப்பெருக்கத் திறனையும் தனித்தனியாகப் புரிந்துகொள்ள வேண்டும் என்பதை இந்தச் சம்பவம் வெளிப்படுத்தியது.பல ஆண்டுகளுக்கு முன்பு உலக ஊடகங்களில் பரபரப்பை ஏற்படுத்திய இந்தக் கதை, தற்போது சமூக வலைத்தளங்களில் மீண்டும் வைரலாகி வருகின்றது.