புதிய கல்வி சீர்திருத்தங்களுக்கு ஆசிய அபிவிருத்தி வங்கி ஆதரவு தற்போதைய அரசாங்கத்தால் மேற்கொள்ளப்பட்ட புதிய கல்வி சீர்திருத்தங்களுக்கு  முழு ஆதரவையும் வழங்கும் என்று ஆசிய அபிவிருத்தி வங்கி  தெரிவித்துள்ளது.  பாராளுமன்ற வளாகத்தில் பிரதமர் கலாநிதி ஹரிணி அமரசூரிய மற்றும் இலங்கைக்கான ஆசிய அபிவிருத்தி வங்கி பணிப்பாளர் தகாஃபுமி கடோனோ மற்றும் பிற ஆசிய அபிவிருத்தி வங்கி பிரதிநிதிகளுக்கிடையே நேற்று (20)  கலந்துரையாடல் இடம்பெற்றது.  இதன்போதே ஆசிய அபிவிருத்தி வங்கியின் பிரதிநிதிகள் தங்களது ஆதரைவத் தெரிவித்துள்ளனர். இது தொடர்பில் கலந்துரையாடலில் தெரிவிக்கப்பட்டதாவது, ஆசிய அபிவிருத்தி வங்கி பிரதிநிதிகளுக்கு புதிய கல்வி சீர்திருத்தங்களுக்காக ஏற்கனவே எடுக்கப்பட்ட நடவடிக்கைகள் மற்றும் பாடசாலைக் கல்வியில் வரும் ஆண்டுக்கான புதிய சீர்திருத்தங்களின் செயல்படுத்தல் மற்றும் அதில் உள்ள சம்பந்தப்பட்ட சவால்கள் குறித்து  பிரதமர் விளக்கினார். புதிய பாடத்திட்டத்தின் தயாரிப்பு, கல்வித் துறையில் மனிதவள வளர்ச்சி, உள்கட்டமைப்பு மேம்பாடு மற்றும் பொதுக் கல்வி, தொழிற்பயிற்சி, உயர் கல்வி மற்றும் ஆரம்பகால குழந்தைப் பருவ வளர்ச்சியில் முன்னெடுப்புகள் தொடர்பான அரசாங்கத்தின் எதிர்கால திட்டங்கள் குறித்து பிரதம அமைச்சர் விரிவாக எடுத்துரைத்தார். ஆசிய வளர்ச்சி வங்கி புதிய கல்வி சீர்திருத்தங்கள் குறித்த தங்களின் திருப்தியைத் தெரிவித்து, ஆசிரியர் பயிற்சி, உட்கட்டமைப்பு மேம்பாடுகள் மற்றும் டிஜிட்டல் தொழில்நுட்ப முன்னேற்றம் உள்ளிட்ட கல்வித் துறையின் வளர்ச்சிக்கு தொடர்ந்து ஆதரவு வழங்குவதற்கான தங்களின் உறுதிப்பாட்டை மீண்டும் உறுதிப்படுத்தியது. இந்த கூட்டத்தில்  ஆசிய அபிவிருத்தி வங்கி பிரதிநிதிகள், கல்வி, உயர் கல்வி மற்றும் தொழிற்பயிற்சி அமைச்சின் செயலாளர் நாளக் கலுவெவ மற்றும் கல்வி அமைச்சின் பிற அதிகாரிகள் கலந்துகொண்டனர்.