எரிபொருள் மின் உற்பத்தி நிலைய மாஃபியாவில் சிக்கியுள்ள அரசாங்கம்: சஜித் குற்றச்சாட்டு. குறைந்த செலவில் புதுப்பிக்கத்தக்க எரிசக்தியை உற்பத்தி செய்யும் திறன் இருந்தபோதிலும், அரசாங்கம் அனல், நிலக்கரி மற்றும் எரிபொருள் மின் உற்பத்தி நிலைய மாஃபியாவின் வலையில் விழுந்துள்ளதாக எதிர்க்கட்சித் தலைவர் சஜித் பிரேமதாச குற்றம் சுமத்தியுள்ளார்.பொதுக்கூட்டமொன்றில் கலந்துகொண்டு உரையாற்றிய போதே எதிர்க்கட்சி தலைவர் சஜித் பிரேமதாச இவ்வாறு தெரிவித்தார்.இது தொடர்பில் அவர் மேலும் தெரிவிக்கையில்,நாட்டு மக்களுக்கு எரிசக்தியை வழங்குவது, குறைந்த செலவில் ஒரு யூனிட்டுக்கு குறைந்த கட்டணம் வசூலிப்பது ஒவ்வொரு அரசாங்கத்தின் பொறுப்பு என்றும், குறைந்த செலவில் மின்சாரம் உற்பத்தி செய்வதற்கான சிறந்த முறை புதுப்பிக்கத்தக்க எரிசக்தி என்றும் தெரிவித்தார்.நீர் மின்சாரம், காற்றாலை மற்றும் சூரிய சக்தி மூலம் உற்பத்தி செய்யப்படும் மின்சாரம் குறைந்த விலையில் இருப்பதால், இந்த குறைந்த விலை மின்சாரத்தை மின்சார நுகர்வோருக்கு குறைந்த விலையில் வழங்க முடியும்.நிலக்கரி மின் உற்பத்தி நிலையங்கள், டீசல் மின் உற்பத்தி நிலையங்கள் மற்றும் அனல் மின் நிலையங்கள் ஆகியவை அதிக செலவில் உற்பத்தி செய்யப்படும் ஆற்றல் மூலங்களாகக் கருதப்படலாம்  எனவும் அவர் தெரிவித்தார்.