உயர்தர பரீட்சைக்கு தகுதி பெற்ற மாணவர்களின் எண்ணிக்கை அதிகரிப்பு கல்வி அமைச்சர் தகவல்  கல்விப் பொதுத் தராதர சாதாரண தரப் பரீட்சையின் பெறுபேறுகளின்படி 245,521 மாணவர்கள் 72.07% உயர்தரத்திற்குத் தகுதி பெற்றுள்ளதாக கல்வி அமைச்சர் சுசில் பிரேமஜயந்த தெரிவித்துள்ளார்.குறித்த விடயம் தொடர்பாக நாடாளுமன்றில் உரையாற்றும் போதே அவர் மேற்கண்டவாறு குறிப்பிட்டுள்ளார்.அத்தோடு, கடந்த வருடம் உயர்தரப் பரீட்சைக்குத் தகுதி பெற்றவர்களின் எண்ணிக்கையில் இந்த வருடம் அதிகரிப்பு ஏற்பட்டுள்ளதாகவும், அந்த வருடம் 62.63% பேர் தகுதி பெற்றுள்ளதாகவும், இந்த வருடம் 72.07% ஆக அதிகரித்துள்ளதாகவும் அமைச்சர் சுட்டிக்காட்டியுள்ளார்.இந்த வருடம் 472,553 மாணவர்கள் சாதாரண தரப் பரீட்சைக்கு தோற்றியிருந்ததாகவும் முடிவுகளின்படி, அனைத்து பாடங்களிலும் 9 'ஏ' சித்திகளையும் பெற்ற 13,588 மாணவர்கள் உள்ளதாகவும், இது சதவீதத்தில் 3.39% என்றும் அமைச்சர் குறிப்பிட்டுள்ளார்.மேலும், கடந்த வருடம் 11,053 மாணவர்கள் சகல பாடங்களிலும் 'ஏ' சித்தியடைந்துள்ளதாகவும், இது சதவீதமாக 3.31% எனவும் அமைச்சர் கூறியுள்ளார்.அதவேளை, உயர்தரப் பரீட்சையின் விடைத்தாள்களை மதிப்பீடு செய்வது தொழில்சார் நடவடிக்கையினால் 3 மாதங்கள் தாமதமானதாகவும், இதன் காரணமாக சாதாரண தரப் பரீட்சை பெறுபேறுகளை வெளியிடுவதில் தாமதம் ஏற்பட்டதாகவும் அமைச்சர் சுசில் பிரேமஜயந்த தெரிவித்தார்.