வாகனங்கள் மீது மோதி சிதறிய விமானம் அமெரிக்காவின் மியாமி சர்வதேச விமான நிலையத்தில் அமேசான் பிரைம் ஏர் சரக்கு விமானம் தரையிறங்கியபோது ஓடுபாதையை விட்டு வெளியேறி பல வாகனங்கள் மீது மோதிய பயங்கர விபத்தில் குறைந்தது 5 பேர் உயிரிழந்தனர். மேலும் 5 பேர் காயமடைந்த நிலையில், அவர்களில் 3 பேரின் நிலைமை கவலைக்கிடமாக இருப்பதாக அதிகாரிகள் தெரிவித்துள்ளனர்.செப்டம்பர் 6ஆம் தேதி பிற்பகல் சுமார் 2 மணியளவில் Prime Air Flight 7598 என்ற சரக்கு விமானம் மியாமி சர்வதேச விமான நிலையத்தில் தரையிறங்கியது.அமேசானுக்காக 21 Air நிறுவனம் இயக்கிய Boeing 767-300 சரக்கு விமானம், தரையிறங்கிய பின்னர் ஓடுபாதையின் முடிவைத் தாண்டிச் சென்றது. தொடர்ந்து விமான நிலையத்தின் எல்லையை கடந்து சாலையில் சென்று பல வாகனங்கள் மீது மோதியது.இந்த விமானம் புவேர்ட்டோ ரிக்கோவின் San Juan நகரில் உள்ள Luis Muñoz Marín International Airport-ல் இருந்து மியாமிக்கு வந்திருந்தது.வாகனங்கள் மீது மோதியதைத் தொடர்ந்து விமானத்தில் தீப்பற்றி, சம்பவ இடத்தில் கடும் புகையும் தீப்பிழம்பும் காணப்பட்டன.தகவல் கிடைத்தவுடன் 60-க்கும் மேற்பட்ட தீயணைப்பு மற்றும் மீட்பு பிரிவுகள் சம்பவ இடத்திற்கு விரைந்தன. விமானத்தில் சிக்கியிருந்த விமானி மற்றும் துணை விமானி உள்ளிட்டவர்களை மீட்கும் பணிகளும் மேற்கொள்ளப்பட்டன. விமானத்தில் இருந்து எரிபொருள் கசிவு ஏற்பட்டதையடுத்து அதனை கட்டுப்படுத்தும் பணிகளும் நடைபெற்றன.விபத்தைத் தொடர்ந்து மியாமி சர்வதேச விமான நிலையத்தின் அனைத்து ஓடுபாதைகளும், டாக்ஸிவேக்களும் தற்காலிகமாக மூடப்பட்டன. விமானங்கள் புறப்படுவதற்கும் தரையிறங்குவதற்கும் கட்டுப்பாடுகள் விதிக்கப்பட்டதால் நூற்றுக்கணக்கான விமான சேவைகள் பாதிக்கப்பட்டன.பின்னர் விமான நிலையத்தின் சில ஓடுபாதைகளில் வழக்கமான செயல்பாடுகள் மீண்டும் தொடங்கப்பட்டதாக அதிகாரிகள் தெரிவித்தனர்.விமானம் ஏன் ஓடுபாதையின் முடிவைத் தாண்டிச் சென்றது என்பது இதுவரை தெரியவில்லை. தரையிறங்குவதற்கு முன் விமானிகள் அவசரநிலையை அறிவித்ததாகத் தகவல் இல்லை என்றும் ஆரம்பகட்ட விசாரணையில் தெரியவந்துள்ளது.விபத்துக்கான காரணத்தை கண்டறிய Federal Aviation Administration (FAA) மற்றும் National Transportation Safety Board (NTSB) விசாரணையைத் தொடங்கியுள்ளன.