எரிபொருள் நெருக்கடியால் பொது சுகாதார பரிசோதகர்கள் சிரமத்தில் விடுக்கப்பட்ட எச்சரிக்கை நாட்டில் நிலவிவரும் எரிபொருள் நெருக்கடியால் பொது சுகாதார பரிசோதகர்கள் கடுமையான சிரமங்களைச் சந்தித்து வருவதாக இலங்கை பொது சுகாதார பரிசோதகர்கள் சங்கம் தெரிவித்துள்ளது.களப்பணிகளை மேற்கொள்ளும் பொது சுகாதார பரிசோதகர்களுக்கு எந்தவொரு சிறப்பு எரிபொருள் ஒதுக்கீடும் வழங்கப்படவில்லை என சுகாதார அமைச்சருக்கு சங்கம் அனுப்பிய கடிதத்தில்  சுட்டிக்காட்டப்பட்டுள்ளது. எரிபொருள் விநியோகத்திற்காகச் செயல்படுத்தப்பட்ட QR அடிப்படையிலான முறைக்கு சங்கம் தனது பாராட்டைத் தெரிவித்துள்ளது. எனினும், தாமதமின்றி அல்லது வரிசைகளில் காத்திருக்காமல், முன்னுரிமை அடிப்படையில் எரிபொருளைப் பெறுவதற்கான ஒரு வழிமுறை இல்லாதது,  உறுப்பினர்களுக்கு ஒரு பெரும் பிரச்சினையாக மாறியுள்ளது என்று சங்கம் தனது கடிதத்தில் சுட்டிக்காட்டியது.இந்த சூழ்நிலை காரணமாக, தொற்றுநோய்களைக் கண்டறிந்து கட்டுப்படுத்துதல், வியாபாரிகளை சோதனை செய்தல் மற்றும் பாடசாலை சுகாதார சேவைகளை வழங்குதல் போன்ற அத்தியாவசியப் பணிகள், தேவைப்படும் காலக்கெடுவிற்குள் நிறைவேற்றப்படாமல் போகும் அபாயம் உள்ளது என்றும் தொழிற்சங்கம் வலியுறுத்தியது.எதிர்காலத்தில் தற்போதைய சூழ்நிலை காரணமாக அதிகாரிகள் மீது அழுத்தம் அல்லது ஒழுங்கு நடவடிக்கை எடுக்கப்பட்டால், தொழிற்சங்க உறுப்பினர்கள் தொழிற்சங்க நடவடிக்கையில் இறங்க நிர்பந்திக்கப்படலாம் என்றும் தொழிற்சங்கம் அந்தக் கடிதத்தில் எச்சரித்துள்ளது.