சவூதியின் எண்ணெய் ஏற்றுமதி திடீர் உயர்வு ஈரானுடனான மோதல் தொடரும் நிலையில், ஹார்முஸ் ஜலசந்தி வழியாக எண்ணெய் போக்குவரத்து மீண்டும் அதிகரித்து வருவதாக அமெரிக்க அதிபர் டொனால்ட் டிரம்ப் தெரிவித்துள்ளார்.“அவர்கள் கைவிட்டுவிடுவார்கள். வரலாற்றில் இதுவரை இல்லாத அளவுக்கு, கடந்த சில நாட்களில் ஹார்முஸ் ஜலசந்தியிலிருந்து அதிக எண்ணெயை எடுத்துள்ளோம்” என டிரம்ப் கூறியுள்ளார்.ஹார்முஸ் ஜலசந்தி வழியாக செல்லும் கப்பல் போக்குவரத்து மோதல் காரணமாக கடுமையாக பாதிக்கப்பட்டிருந்த நிலையில், தற்போது அமெரிக்க பாதுகாப்புடன் சில எண்ணெய் கப்பல்கள் அந்தப் பாதையைப் பயன்படுத்தத் தொடங்கியுள்ளன. இதனால் வளைகுடா பிராந்தியத்திலிருந்து உலக சந்தைக்கு செல்லும் எண்ணெய் விநியோகம் ஓரளவு மீண்டு வருகிறது.இதற்கிடையில், சவூதி அரேபியாவின் கச்சா எண்ணெய் ஏற்றுமதியும் செப்டம்பர் மாதத்தில் குறிப்பிடத்தக்க அளவில் உயர்ந்துள்ளது. Kpler தரவின்படி, சவூதியின் கச்சா எண்ணெய் ஏற்றுமதி தினசரி சராசரியாக சுமார் 60 லட்சம் பீப்பாய்களை எட்டியுள்ளது. இது ஆகஸ்ட் மாதத்தின் சுமார் 34 லட்சம் பீப்பாய்களுடன் ஒப்பிடுகையில் கணிசமான அதிகரிப்பாகும்.மேலும், ட்ரோன் தாக்குதலால் சேதமடைந்த சவூதியின் கிழக்கு–மேற்கு எண்ணெய்க் குழாய் மீண்டும் செயல்பாட்டுக்கு வந்துள்ளது. இந்தக் குழாயின் மொத்த கொள்ளளவு தினசரி 70 லட்சம் பீப்பாய்கள் வரை உள்ளது. செங்கடல் வழியாக எண்ணெயை ஏற்றுமதி செய்ய இந்த மாற்றுப் பாதை முக்கியத்துவம் பெற்றுள்ளது.இதனால், ஹார்முஸ் ஜலசந்தி மீதான அழுத்தம் தொடர்ந்தாலும், மாற்றுப் பாதைகள் மற்றும் பாதுகாப்புடன் இயங்கும் கடல் வழித்தடங்கள் மூலம் வளைகுடா நாடுகள் உலக சந்தைக்கு எண்ணெய் விநியோகத்தைத் தொடர்ந்து மேற்கொள்ள முயற்சித்து வருகின்றன. இருப்பினும், பிராந்திய மோதல் மற்றும் கப்பல் பாதுகாப்பு தொடர்பான அபாயங்கள் நீடிப்பதால், உலக எண்ணெய் விலை மற்றும் விநியோக நிலைமை தொடர்ந்து கவனிக்கப்படுகிறது.