போதையில் வர்த்தக நிலையங்களில் அட்டகாசம் செய்த மதகுரு வவுனியாவில் பரபரப்பு சம்பவம் வவுனியா - புகையிரத வீதியில் உள்ள வர்த்தக நிலையத்தில் மதுபோதையில் அட்டகாசம் செய்த மதகுரு ஒருவர் கைது செய்யப்பட்டுள்ளார்.சம்பவம் தொடர்பில் மேலும் தெரியவருகையில்,வவுனியா, புகையிரத நிலைய வீதியில் மதுபோதையில்  நேற்றுமுன்தினம்   இரவு 9.30 மணியளவில் சென்ற இந்து மதகுரு ஒருவர்,அப்பகுதியில் உள்ள உணவகம் ஒன்றின் கொத்து ரொட்டி போடும் கூட்டு கண்ணாடியை உடைத்து சேதப்படுத்தியதுடன், அருகில் இருந்த தொலைகாட்சி திருத்துமிடத்தில் காட்சிக்காக வைக்கப்பட்டிருந்த பழைய தொலைக்காட்சி பெட்டிகளையும் சேதப்படுத்தியுள்ளார்.இதனையடுத்து குறித்த வர்த்தக நிலைய உரிமையாளர்கள் மற்றும் வீதியில் சென்றோர் குறித்த மதகுருவை மடக்கிப்பிடித்து வைத்திருந்ததுடன், வவுனியா பொலிசாருக்கு தகவல் வழங்கியிருந்தனர்.சம்பவ இடத்திற்கு சென்ற பொலிசார் குறித்த மதகுருவை கைது செய்ததுடன், வவுனியா பொலிஸ் காவலில் வைத்து விசாரணைகளை மேற்கொண்ட பின் நேற்று பொலிஸ் பிணையில் விடுவித்துள்ளதாக பொலிசார் மேலும் தெரிவித்தனர்.