பாகிஸ்தானில் அமெரிக்கா - ஈரான் இடையிலான சமாதான பேச்சுவார்த்தை பாகிஸ்தான் பிரதமர் ஷேபாஸ் ஷெரீப் தலைமையில், அமெரிக்கா மற்றும் ஈரான் நாடுகளின் உயர்மட்ட பிரதிநிதிகள் பங்கேற்கும்  சமாதான பேச்சுவார்த்தை இஸ்லாமாபாத்தில் நடைபெறுகிறது.இந்தப் பேச்சுவார்த்தையை முன்னிட்டு இஸ்லாமாபாத் மற்றும் ராவல்பிண்டியில் பலத்த பாதுகாப்புடன் கூடிய இரண்டு நாள் பொது விடுமுறை அறிவிக்கப்பட்டுள்ளது. அமெரிக்க தரப்பில் துணை அதிபர் ஜே.டி. வான்ஸ், ஜாரெட் குஷ்னர் மற்றும் போர்நிறுத்த பேச்சுவார்த்தைகளில் அனுபவம் வாய்ந்த  தூதுவர் ஸ்டீவ் விட்காஃப் ஆகியோர் பங்கேற்கின்றனர்.ஈரான் தரப்பில் அந்நாட்டின் நாடாளுமன்ற சபாநாயகர் முகமது பாகர் காலிபாஃப், வெளியுறவு அமைச்சர் அப்பாஸ் அராக்ஷி மற்றும் பாதுகாப்பு கவுன்சில் உறுப்பினர் முகமது பாகர் சொல்கத்ர் ஆகியோர் கலந்துகொள்கின்றனர். பாகிஸ்தான் வெளியுறவு அமைச்சர் இஷாக் தார் மற்றும் ராணுவத் தளபதி ஆசிம் முனீர் ஆகியோரும் இதில் முக்கியப் பங்காற்றுகின்றனர்.இந்தச் சந்திப்பில் இரு நாடுகளுக்கும் இடையே நிலவும் ராணுவ மோதல்களை முடிவுக்குக் கொண்டுவருவது, ஹார்முஸ் ஜலசந்தி வழியாக சர்வதேச எண்ணெய் போக்குவரத்தை உறுதி செய்வது மற்றும் ஈரானின் அணுசக்தி திட்டங்கள் தொடர்பான நீண்டகாலப் பிரச்சினைகளுக்குத் தீர்வு காண்பது ஆகியவை முதன்மையான குறிக்கோள்களாக உள்ளன.இந்த ராஜதந்திர முயற்சி, மத்திய கிழக்கு நாடுகளில் அமைதியை நிலைநாட்டவும், உலகளாவிய பொருளாதாரப் பாதிப்புகளைத் தவிர்க்கவும் மிக முக்கியமான ஒன்றாகப் பார்க்கப்படுகிறது.இந்த பேச்சுவார்த்தையின் முடிவுகள் சர்வதேச அரசியலில் பெரும் மாற்றத்தை ஏற்படுத்தும் என எதிர்பார்க்கப்படுகிறது