200 மில்லியன் ரூபா நிதி ஒதுக்கீட்டில் 'பெரிய மிஹிந்தலை' திட்டம் இந்த ஆண்டு ஆரம்பம். பெரிய மிஹிந்தலை திட்டம் இந்த வருடம் ஆரம்பிக்கப்படும் எனவும் இத்திட்டத்திற்காக 200 மில்லியன் ரூபா ஒதுக்கீடு செய்யப்பட்டுள்ளதாகவும் தெரிவிக்கப்படுகிறது.அதேவேளை, பெரிய மிஹிந்தலை திட்டத்தின் எஞ்சிய அபிவிருத்திப் பணிகள் அரச மற்றும் தனியார் பங்களிப்பைப் பயன்படுத்தி தனியார் துறையின் நிதி பங்களிப்புடன் மேற்கொள்ளப்படவுள்ளது.அத்துடன், நெடுஞ்சாலைகள் அமைச்சு மற்றும் நகர மற்றும் வீடமைப்பு அமைச்சின் கூட்டுத் திட்டமாக பெரிய  மிஹிந்தலை திட்டத்தை நடைமுறைப்படுத்துவதற்கு அறிவுறுத்தல்கள் கிடைத்துள்ளதாக நகர அபிவிருத்தி அதிகார சபையின் வடமத்திய மாகாண பணிப்பாளர் எச்.டபிள்யூ. சோமரத்ன தெரிவித்தார். திட்டத்திற்கான பரிந்துரைகளைப் பெறுவதற்காக, வன ஜீவராசிகள் பாதுகாப்புத் திணைக்களம், புகையிரத திணைக்களம், வனப் பாதுகாப்புத் திணைக்களம் மற்றும் தொல்பொருளியல் திணைக்களம் ஆகிய நிறுவனங்களின் பொறுப்புகளைக் கண்டறிந்து திட்டத்திற்கான பரிந்துரைகளைப் பெறுவதற்கான சாத்தியக்கூறு ஆய்வை நடத்தவும் திட்டமிடப்பட்டுள்ளது.விசேடமாக அநுராதபுர யாத்திரை காலங்களில் மாத்திரம் செயற்படும் மிஹிந்தலை புகையிரதத்திற்கு அனைத்து காலங்களிலும் முக்கியத்துவம் மற்றும் செயற்பாடுகளை வழங்குவதற்கு கவனம் செலுத்தப்பட்டுள்ளதாகவும் பணிப்பாளர் தெரிவித்தார். இந்த ரயில் பாதை திருகோணமலை வரை அபிவிருத்தி செய்யப்படுவதோடு, அதே நேரத்தில் போக்குவரத்து பொருளாதாரம் மற்றும் கொள்கலன்கள் மற்றும் களஞ்சியசாலை கொண்ட ஒரு பெரிய நகரமும் உருவாக்கப்படும். ரயில் நிலையத்தை ஒட்டி ஒரு வர்த்தக நிலையம் அமைக்கவும் எதிர்பார்க்கப்படுகிறது.இந்த வர்த்தக நிலையத்தில் பூங்காக்கள், சுகாதார நிலையங்கள், ஹோட்டல்கள், வர்த்தக நிலையங்கள், புகையிரத முனையங்கள், இடைப்பட்ட கொள்கலன் முனையம், உணவு பதப்படுத்தும் வலயம் போன்ற வசதிகளை ஏற்படுத்த கவனம் செலுத்தப்பட்டுள்ளது.தற்போது, இலங்கைக்கு பொருட்களை இறக்குமதி செய்யும் பாரிய வர்த்தக நிறுவனங்கள் மற்றும் மிஹிந்தலை நகரில் உள்ளூரில் பிராந்திய விநியோக நிலையத்தை நிறுவுவதன் முக்கியத்துவம் குறித்து ஆரம்பகட்ட விசாரணைகள் இடம்பெற்று வருகின்றன. ரஜரட்ட பல்கலைக்கழகத்தின் முகாமைத்துவ பீடத்தினால் முழு செயற்திட்டத்தின் ஆரம்ப சாத்தியக்கூறு ஆய்வு மேற்கொள்ளப்பட்டு அதற்கான அனுமதியும் பெறப்பட்டுள்ளது.பௌத்த பக்தர்கள் வழிபட வருகை தரும் மிஹிந்தலை சுற்றுலாப் பயணிகளை ஈர்க்கும் நகரமாகவும் உள்ளது. அதற்கான பொருளாதார பெறுமதியை இனங்கண்டு பெரிய  மிஹிந்தலை திட்டம் நடைமுறைப்படுத்தப்படும் என பணிப்பாளர் தெரிவித்தார்.அநுராதபுரம் புண்ணிய பூமியை அண்மித்த பகுதிகளில் நகர அபிவிருத்தி அதிகாரசபை பல விசேட அபிவிருத்தி திட்டங்களை நடைமுறைப்படுத்தியுள்ளது. மூலோபாய நகர அபிவிருத்தி திட்டத்தின் கீழ் இது நடைமுறைப்படுத்தப்பட்டது.இந்த அபிவிருத்தித் திட்டத்தின் கீழ் அனுராதபுரம் ஒருங்கிணைந்த நகர அபிவிருத்தித் திட்டம் இலங்கை அரசாங்கத்திற்கும் பிரான்ஸ் நிறுவனத்திற்கும் இடையிலான பங்காளித்துவத்துடன் ஆரம்பிக்கப்பட்டது. அனுராதபுரத்தின் இயற்கை பாரம்பரியத்தை பாதுகாக்கும் அதே வேளையில் அநுராதபுர நகரின் புனித மற்றும் நவீன பகுதிகளுக்கு இடையில் அபிவிருத்திக்கான சமச்சீர் முறையை பிரபலப்படுத்தும் நோக்கத்துடன் இந்த திட்டம் நடைமுறைப்படுத்தப்பட்டது. இதற்காக ஒதுக்கப்பட்ட தொகை 62.4 மில்லியன் யூரோக்கள். இத்திட்டத்தின் கீழ் 11 துணைத் திட்டங்கள் செயல்படுத்தப்பட்டன. இதில் 10 திட்டங்கள் இதுவரை முடிக்கப்பட்டுள்ளன.அநுராதபுரம்  தூபாராமயவில் இருந்து ருவன்வெலி சாய வரையிலான வீதி மற்றும் ருவன்வெலி சாயேயின் உள்நுழையும் வீதி ஆகியவற்றிலும் இத்திட்டத்தின் கீழ் அபிவிருத்திப் பணிகள் மேற்கொள்ளப்பட்டன. தூபாராம முதல் ருவன்வெலி சாய வரையிலான வீதி கற்களை அகற்றி, குடிநீர் வசதிகளை ஏற்படுத்தி, பக்தர்கள் இளைப்பாறுவதற்கு வழிவகை செய்யப்பட்டுள்ளது. இதேவேளை, ருவன்வெலி சாயவிற்கு செல்லும் பிரதான வீதியும் அபிவிருத்தி செய்யப்பட்டது. ருவன்வெலி சாய புண்ணிய பூமிக்கு அருகாமையில் நுழைவு மற்றும் வெளியேறும் கதவுகளை உருவாக்குதல், பாதுகாப்பிற்காக புதிய காவலரண்களை உருவாக்குதல் மற்றும் தானியங்கி தெளிப்பான்கள் பொருத்துதல் போன்ற பணிகள் மேற்கொள்ளப்பட்டதாக நகர அபிவிருத்தி அதிகார சபை தெரிவித்துள்ளது.அனுராதபுரம் புண்ணிய நகரில், ஸ்ரீ மஹா போதி கிழக்கு வாகனம் நிறுத்தும் இடம்  மற்றும் தெற்கு வாகனம் நிறுத்தும் இடம்  , மிரிசவடிய வாகனம் நிறுத்தும் இடம்  , லங்காராமய வாகனம் நிறுத்தும் இடம்  ஆகியவை அபிவிருத்தி செய்யப்பட்டுள்ளன. கார் பார்க்கிங்குகள் நவீன வசதிகளுடன் பொருத்தப்பட்டுள்ளன, அவை நிலையான வடிகால் அமைப்புகள், திறமையான மைக்ரோ-நீர் விநியோக பாதைகள், புல்வெளிகள் மற்றும் டிக்கெட் கவுன்ட்டர்களுடன் கூடிய தானியங்கி வாயில்கள் போன்ற வடிவமைப்பு அம்சங்களை உள்ளடக்கியது. தொல்பொருளியல் திணைக்களத்தின் மேற்பார்வையில் பல்வேறு வகையான பெயர் பலகைகள் நிறுவும் பணி நிறைவு பெற்றது. இந்த தளத்தை அடையாளம் கண்டு, அதன் தொல்பொருள் அம்சங்களின் முக்கியத்துவம் குறித்த விழிப்புணர்வை ஏற்படுத்துவது மற்றும் சுற்றுலாப் பயணிகளுக்கு இந்த முக்கிய அம்சங்களை அடையாளம் காண உதவுவது இதன் நோக்கமாகும்.1795.30 மில்லியன் ரூபா செலவில் நிர்மாணிக்கப்பட்ட அனுராதபுரம் தெற்கு பல்வகை போக்குவரத்து நிலையத்தின் நிர்மாணப் பணிகள் தற்போது நடைபெற்று வருகின்றன. இந்த நிலையம் உணவுசாலை, தங்கும் விடுதிகள் மற்றும் நவீன வசதிகளுடன் உள்ளது. அநுராதபுரத்திற்கு வரும் குறுகிய மற்றும் நீண்ட தூர பேருந்து சேவைகள் மற்றும் புகையிரத சேவைகளின் கூட்டு ஏற்பாட்டை இந்த பல்வகை போக்குவரத்து நிலையத்தில் செயல்படுத்த திட்டமிடப்பட்டுள்ளது. அனுராதபுரம் தெற்கு பல்வகை போக்குவரத்து நிலையத்தின் நிர்மாணப் பணிகள் இவ்வருடத்தில் பூர்த்தி செய்ய திட்டமிடப்பட்டுள்ளது.