இலங்கையில் நுகர்வோர் பொருட்களின் தரத்தை ஆய்வு செய்ய புதிய தேசியத் திட்டம் இலங்கையில் விற்பனை செய்யப்படும் நுகர்வோர் பொருட்களின் தரம், சுகாதாரம் மற்றும் பாதுகாப்பை உறுதிப்படுத்தும் நோக்கில், அறிவியல் மற்றும் தொழில்நுட்ப அமைச்சினால் “வி-பிரமிதி” என்ற புதிய தேசியத் திட்டம் தொடக்கி வைக்கப்பட்டுள்ளது.‘தூய்மையான இலங்கை’ முன்னெடுப்பு மற்றும் தேசிய ஒருமைப்பாட்டு வாரத்தின் ஒரு பகுதியாக, கொழும்பு பெட்டா பொதுச் சந்தைப் பகுதியில் இத்திட்டத்தின் ஆரம்பக் கள ஆய்வுகள் முன்னெடுக்கப்பட்டன.இத்திட்டத்தின் தொடக்க ஆய்வாக, தெருவோர உணவுகள், தேங்காய் எண்ணெய், சிறுவர் பொம்மைகள், வெல்லம், பாகு, அழகுசாதனப் பொருட்கள், மசாலாப் பொருட்கள் மற்றும் மின் சாதனங்கள் உள்ளிட்ட பல்வேறு பொருட்களின் மாதிரிகள் அதிகாரிகளால் சீரற்ற முறையில் சேகரிக்கப்பட்டு ஆய்வகப் பரிசோதனைக்கு உட்படுத்தப்பட்டன.சந்தைக்கு வரும் உணவு, பானங்கள் மற்றும் நுகர்வோர் பொருட்கள், மனித உடலுக்குத் தீங்கு விளைவிக்கும் நச்சுக்கள் மற்றும் கன உலோகங்கள்  இல்லாதவை என்பதை உறுதி செய்வதே இத்திட்டத்தின் முதன்மை நோக்கம் என அறிவியல் மற்றும் தொழில்நுட்ப அமைச்சர் பேராசிரியர் கிறிஷாந்த அபேசேன தெரிவித்தார்.இலங்கை தர நிர்ணய நிறுவனம் (SLSI), தொழிற்துறை தொழில்நுட்ப நிறுவனம் (ITI) மற்றும் இலங்கை அணுசக்தி சபை ஆகியவற்றின் தொழில்நுட்ப ஆதரவுடன் முன்னெடுக்கப்படும் இத்திட்டம், சுகாதார அமைச்சு, நுகர்வோர் விவகார அதிகார சபை மற்றும் இலங்கை காவல்துறை ஆகியவற்றின் கூட்டு ஒத்துழைப்புடன் செயல்படுத்தப்பட்டு வருகின்றது.நுகர்வோரைப் பாதுகாப்பது, உற்பத்தியாளர்கள் மற்றும் வர்த்தகர்களிடையே தர நிர்ணயங்களை மேம்படுத்துவது மற்றும் பாதுகாப்பற்ற பொருட்கள் சந்தைக்கு வருவதைத் தடுப்பதே இத்திட்டத்தின் பிரதான இலக்காகும்.