விவசாயிகளின் உரத்திற்கும் QR குறியீடா சஜித் எச்சரிக்கை இலங்கையில் உர விநியோகத்தை முறைப்படுத்துவதற்காக QR குறியீடு (QR Code) நடைமுறையை அறிமுகப்படுத்த அரசாங்கம் தீர்மானித்துள்ளது. எனினும், இந்த நடவடிக்கை விவசாயிகளிடையே அச்சத்தை ஏற்படுத்தியுள்ளதாக எதிர்க்கட்சித் தலைவர் சஜித் பிரேமதாச சுட்டிக்காட்டியுள்ளார்.விவசாயம், கால்நடை, காணி மற்றும் நீர்ப்பாசன அமைச்சர் கே.டி. லால் காந்தா இது குறித்துத் தெரிவிக்கையில், உர விநியோகத்தில் நிலவும் முறைகேடுகளைத் தவிர்க்கவும், விநியோகத்தை சீரமைக்கவும் QR முறைமைக்கான முன்னோடித் திட்டம் விரைவில் ஆரம்பிக்கப்படும் என்றார்.சந்தையில் சில தனியார் நிறுவனங்கள் மற்றும் கறுப்புச் சந்தை வியாபாரிகள் உர மூட்டை ஒன்றின் விலையை 12,000 - 13,000 ரூபாய் வரை அதிகரித்துள்ளதாகத் தெரிவித்தார்.அநியாயமாக விலையை உயர்த்த வேண்டாம் என நிறுவனங்களுக்கு அறிவுறுத்தப்பட்டுள்ளதுடன், நுகர்வோர் விவகார அதிகாரசபை இதில் தலையிட வேண்டும் எனவும் அவர் கோரினார்.தற்போது போதிய உரக் கையிருப்பு உள்ளதாகவும், மே மாதம் சீனாவிலிருந்து மேலதிக  உரம் கிடைக்கவுள்ளதால் சிறுபோகத்தில் உரத் தட்டுப்பாடு ஏற்படாது என்றும் அமைச்சர் உறுதியளித்தார்.அரசாங்கத்தின் நிர்வாகத் திறமையின்மை குறித்துக் கருத்துத் தெரிவித்த எதிர்க்கட்சித் தலைவர் சஜித் பிரேமதாச, தற்போதைய ஆட்சியின் கீழ் விவசாயிகள் பெரும் பாதிப்புக்குள்ளாகி வருவதாகக் குறிப்பிட்டார்.தரம் குறைந்த நிலக்கரி இறக்குமதி செய்யப்பட்டதால் மின் உற்பத்தி 135 மெகாவோட்டினால் குறைவடைந்துள்ளது. இதன் சுமை அப்பாவி நுகர்வோர் மீதே சுமத்தப்படுவதாக அவர் சாடினார்.தரமற்ற மருந்துகள் மற்றும் முறையற்ற நிர்வாகத்தினால் ஏற்கனவே மக்கள் அவதிப்படும் நிலையில், எதிர்காலத்தில் உரத்தைப் பெற்றுக்கொள்வதற்கும் விவசாயிகள் QR குறியீட்டிற்காக வரிசையில் நிற்க வேண்டிய நிலை ஏற்படுமோ என்ற அச்சம் எழுந்துள்ளதாக அவர் தெரிவித்தார்.ஊழல் மற்றும் திறனற்ற ஆட்சிக்கு எதிராக மக்கள் ஒன்றிணைய வேண்டிய தருணம் இதுவெனவும் அவர் வலியுறுத்தினார்.அரசாங்கம் முறைப்படுத்துதலுக்காக QR குறியீட்டை முன்னெடுக்க முயலும் நிலையில், அது விநியோகச் சங்கிலியில் மேலும் சிக்கல்களை உருவாக்குமா அல்லது தீர்வாக அமையுமா என்பதைப் பொறுத்திருந்துதான் பார்க்க வேண்டும்.