அடுத்த 36 மணித்தியாலங்களுக்கு பல இடங்களில் பலத்த மழைவீழ்ச்சி தென்மேற்கு வங்கக்கடலில் நீடிக்கும் குறைந்த காற்றழுத்த தாழ்வு நிலை வடமேற்கு திசையில் மேற்கு நோக்கி மெதுவாக நகர்ந்து இலங்கையின் வடக்கு கடற்கரையை அண்மித்து தமிழக கடற்கரையை அடையும் சாத்தியம் காணப்படுவதாக வளிமண்டலவியல் திணைக்களம் எதிர்வு கூறியுள்ளது.இதன் காரணமாக வடக்கு, வடமத்திய, கிழக்கு, மேல் மற்றும் வட மேல் மாகாணங்களில் மழை அல்லது இடியுடன் கூடிய மழை பெய்யக் கூடும் எனவும் வடமாகாணத்தில் சில இடங்களில் 75 மில்ல மீற்றர் வரை பலத்த மழை வீழ்ச்சி பதிவாக கூடும் என தெரிவிக்கப்பட்டுள்ளது.தென்மேற்கு வங்கக்கடலில் குறைந்த காற்றழுத்த தாழ்வு நிலை நீடிப்பதால் புத்தளத்திலிருந்து மன்னார், காங்கேசன்துறை ஊடாக முல்லைத்தீவு வரையான ஆழ்கடல் மற்றும் ஆழமற்ற கடற்பகுதிகளில் மீன்பிடி மற்றும் கடற்றொழில் நடவடிக்கைகளில் ஈடுபடுவதை தவிர்க்குமாறு அறிவிக்கப்பட்டுள்ளது.இடியுடன் கூடிய மழை வீழ்ச்சி பலத்த காற்று மற்றும் மின்னல் தாக்கங்களினால் ஏற்படக்கூடிய ஆபத்துக்கள் தொடர்பில் பொது மக்கள் அவதானத்துடன் செயற்படுமாறு கேட்டுக்கொள்ளப்பட்டுள்ளனர்.அத்துடன் புத்தளத்திலிருந்து மன்னார் மற்றும்காங்கேசன்துறை ஊடாக முல்லைத்தீவு வரையான கடற்பரப்பு கொந்தளிப்பாககாணப்படும் எனவும் புத்தளத்தில் இருந்து கொழும்பு ஊடாக காலி வரையான கடற்பரப்புகள் ஓரளவு கொந்தளிப்பாகவும் காணப்படும் எனவும் தெரிவிக்கப்பட்டுள்ளது.நாட்டைச் சூழவுள்ள ஏனைய கடற்பரப்புகள் அவ்வப்போது சிறிதளவு கொந்தளிப்புடன் காணப்படுவதுடன், இடியுடன் கூடிய மழை பெய்யும் சந்தர்ப்பங்களில் அக்கடற்பரப்புகளில் பலத்த காற்று வீசக்கூடும் எனவும், பின்னர் அந்த கடற்பரப்புகள் தற்காலிகமாக மிகவும் கொந்தளிப்பாக காணப்படும் எனவும் தெரிவிக்கப்பட்டுள்ளது.அனர்த்தங்கள் குறித்து அவதானம் செலுத்துமாறும், ஏதேனும் அனர்த்த நிலைமைகள் பதிவாகுமாயின், அனர்த்த முகாமைத்துவ நிலையத்தின் அவசர இலக்கமான 117 என்ற இலக்கத்திற்கு அழைப்பை ஏற்படுத்தி தகவல் வழங்குமாறும் பொது மக்களுக்கு அறிவுறுத்தப்பட்டுள்ளது.