முன்னாள் ஜனாதிபதி மைத்திரிபால சிறிசேனவினால் நவீனமயமாக்கப்பட்ட கப்பல்துறை கட்டடம் திறந்து வைப்பு இலங்கை துறைமுகங்கள் மற்றும் கப்பல் சேவை கூட்டுறவுச் சங்கத்திற்குச் சொந்தமான, கொழும்பு 11, பிரதான வீதி, இலக்கம் 37 என்ற முகவரியில் அமைந்துள்ள கப்பல்துறை கட்டடம் நவீனமயமாக்கப்பட்டு, உறுப்பினர்களின் நலனுக்காக இன்று திறந்து வைக்கப்பட்டது.இந்நிகழ்வில் நாட்டின் 7வது நிறைவேற்று அதிகாரக் கொண்ட முன்னாள் ஜனாதிபதி மைத்திரிபால சிறிசேன அவர்கள் சிறப்பு விருந்தினராகக் கலந்துகொண்டதுடன், குறித்த கட்டடத்தையும் உத்தியோகபூர்வமாகத் திறந்து வைத்தார்.திறப்பு விழாவைத் தொடர்ந்து நடைபெற்ற புதிய நிர்வாக சபைக் கூட்டத்தில் கலந்துகொண்டு உரையாற்றிய முன்னாள் ஜனாதிபதி மைத்திரிபால சிறிசேன அவர்கள், கூட்டுறவு வணிகம் மற்றும் அதன் சங்கம் பற்றிய தனது வரலாற்று அனுபவங்களை நினைவுகூர்ந்தார். கூட்டுறவுத் துறையில் தனக்கு நீண்டகால அனுபவம் உள்ளதாகவும், தான் அனுராதபுரம் மற்றும் பொலன்னறுவை ஆகிய மாவட்டங்களில் பல்வேறு கூட்டுறவு சங்கங்கள் மற்றும் நிறுவனங்களுடன் இணைந்து பணியாற்றியுள்ளதாகவும், கூட்டுறவுப் பள்ளியில் கல்வி கற்பித்த அனுபவமும் தனக்கு உண்டு என்றும் அவர் குறிப்பிட்டார்.தொடர்ந்து பேசிய அவர், முன்கூட்டிய காலத்தில் திறம்பட இயங்கிய கூட்டுறவுத் துறை, காலப்போக்கில் பலவீனமடைந்து வீழ்ச்சியடையத் தொடங்கியதாகக் குறிப்பிட்டார். திறந்த பொருளாதாரக் கொள்கைகள் மற்றும் சர்வதேசப் பொருளாதார மாற்றங்கள் இதற்கு ஒரு காரணம் என்றாலும், திறமையான நிர்வாகமின்மையே பிரதான காரணமாகும் என்றும் அவர் சுட்டிக்காட்டினார். எனினும், அண்மைக் காலமாக கூட்டுறவுச் சங்கங்கள் புதிய உத்வேகத்துடன் புதிய வர்த்தகப் பலங்களுடன் புத்துயிர் பெற்று வருவது பெருமகிழ்ச்சி அளிப்பதாக அவர் தெரிவித்தார்.ஐரோப்பிய நாடுகளில் பால் உற்பத்தி, விவசாயம் மற்றும் பல்வேறு துறைகளில் கூட்டுறவுச் சங்கங்கள் மிகப்பெரிய அளவில் லாபகரமாகவும் திறம்படவும் இயங்கி வருவதை குறிப்பிட்ட அவர், அந்த நாடுகளுடன் ஒப்பிடும் போது நமது நாட்டின் கூட்டுறவுச் சங்கங்கள் இன்னும் வளர்ச்சியடைய வேண்டியதன் அவசியத்தையும் வலியுறுத்தினார். மேலும், கூட்டுறவுச் சங்கங்கள் என்பவை பெரிய பணக்காரர்களுக்காக உருவாக்கப்பட்டவை அல்லவென்றும், மாறாக கிராமப்புற ஏழை எளிய பொதுமக்கள் மற்றும் நடுத்தர மக்களின் அத்தியாவசியத் தேவைகளைப் பூர்த்தி செய்யும் மிக முக்கியமான அமைப்புகளாகும் என்றும் அவர் எடுத்துரைத்தார்.நிகழ்வின் நிறைவாக, புதிய கூட்டுறவு சங்க நிர்வாகத்திற்கும், புதிய வர்த்தக முயற்சிகளுக்கும் தனது மனமார்ந்த வாழ்த்துக்களையும் நன்றிகளையும் முன்னாள் ஜனாதிபதி மைத்திரிபால சிறிசேன அவர்கள் தெரிவித்துக் கொண்டார். இந்நிகழ்வில் ஊடகவியலாளர்கள் மற்றும் பல முக்கிய பிரமுகர்களும் கலந்துகொண்டமை குறிப்பிடத்தக்கது.