யாழ் பேரிடர் தடுப்பு நடவடிக்கைக்கு தயார் – முதல்வர் மதிவதனி நடவடிக்கை. யாழ்ப்பாணம் மாநகரசபைக்குட்பட்ட பகுதிகளில் ஏற்படும் மழை வெள்ளப் பாதிப்புக்களிலிருந்து பொது மக்களைப் பாதுகாக்கும் நடவடிக்கைகளுக்கு தேவையான முழுமையான முன் ஏற்பாடுகளுடன் மாநகரசபை நிர்வாகம் தயார் நிலையில் உள்ளதை மாநகர முதல்வர் திருமதி மதிவதனி விவேகானந்தராசா உறுதிப்படுத்தியுள்ளார்.மழை வெள்ளப் பாதிப்புக்களை குடியிருப்புப் பகுதிகளில் குறைக்கும் முகமாக மழை வெள்ள நீரை வழிந்தோடச் செய்வதற்கான தற்காலிக நடவடிக்கைகள் மற்றும் அதீத பாதிப்புக்கள் காரணமாக பிரதேச செயலகங்களால் ஏற்படுத்தப்படும் இடைத்தங்கல் முகாம்களுக்கான அடிப்படை வசதிகளை ஏற்படுத்தல் உள்ளிட்ட முக்கிய சேவைகளை வழங்குவதற்கு ஏதுவாக மாநகரசபையின் பொதுச் சுகாதார பொறியியற் பிரிவு, சுகாதாரப் பிரிவு, மின்சாரப் பகுதி மற்றும் தீயணைப்பு பிரிவு உள்ளிட்ட முக்கிய மாநகர திணைக்களங்களும், அதன் உத்தியோகத்தர்களும் தயார் நிலையில் உள்ளனர்.மேலும் முதல்வர் திருமதி மதிவதனி விவேகானந்தராசா அவர்களின் வழிகாட்டலில் தொடர்ந்தும் மாநகர எல்லைப் பிரதேசங்களில் மழை வெள்ளநீர் வழிந்தோடுவதற்கான தற்காலிக நடவடிக்கைகளை மாநகர ஊழியர்கள், உத்தியோகத்தர்களைக் கொண்டு பிரதி முதல்வர், மராமத்துக்குழு தலைவர், சுகாதாரக்குழு தலைவர் மற்றும் மாநகரசபை உறுப்பினர்கள் குழு களத்தில் தொடர்ந்தும் முன்னெடுத்துக் கொண்டிருப்பது குறிப்பிடத்தக்கதாகும்.வெள்ளப் பாதிப்புக்களை கட்டுப்படுத்துவதற்கான அவசர நடவடிக்கைகள் மற்றும் மாநகர சபையின் அடிப்படை தேவைகளுக்கான முறைப்பாடுகளை வழங்குவதற்காக பொது மக்கள் மாநகரசபையின் 021 222 2275 என்ற தொலைபேசி இலக்கத்திற்கு எந்நேரமும் அழைக்க முடியும்.