கந்தளாய் குளக்கட்டு பகுதியில் நவீன உடற்பயிற்சி முற்றம்: சுற்றுலாத்துறையை மேம்படுத்த புதிய நடவடிக்கை திருகோணமலை மாவட்டத்தின் வரலாற்றுப் புகழ் மிக்க கந்தளாய் குளத்தின் இயற்கை அழகை ரசித்தபடி, பொதுமக்கள் மற்றும் சுற்றுலாப் பயணிகள் தமது உடல் ஆரோக்கியத்தைப் பேணும் வகையில் புதிய திறந்தவெளி உடற்பயிற்சி உபகரணங்கள் (Outdoor Gym) குளக்கட்டுப் பகுதியில் நிறுவி தயார்படுத்தப்பட்டுள்ளன.சுற்றுலாத்துறையை மேம்படுத்துவதையும், ஆரோக்கியமான சமூகத்தை உருவாக்குவதையும் நோக்கமாகக் கொண்டு இந்தத் திட்டம் முன்னெடுக்கப்பட்டுள்ளது.குளக்கட்டின் இயற்கைச் சூழலுக்கு பாதிப்பு ஏற்படாத வகையில், பல்வேறு வகையான உடற்பயிற்சி சாதனங்கள் பொதுமக்களின் பயன்பாட்டிற்காக அமைக்கப்பட்டுள்ளன.உள்நாட்டு மற்றும் வெளிநாட்டு சுற்றுலாப் பயணிகளை கவரும் வகையில் குளக்கட்டு பகுதி அழகுபடுத்தப்பட்டுள்ளதுடன், இது ஒரு மாலைநேர பொழுதுபோக்கு மையமாகவும் உருவெடுத்துள்ளது.உடற்பயிற்சி நிலையங்களுக்குச் செல்ல வசதியற்ற சாதாரண மக்களும், முதியவர்களும் குளத்தின் இதமான காற்றை சுவாசித்தபடி இலவசமாக உடற்பயிற்சி செய்ய இந்த முற்றம் வழிவகுக்கிறது.அரசாங்கத்தினால் பெருந்தொகை செலவில் அமைக்கப்பட்டுள்ள இந்த பொதுச் சொத்துக்களைச் சேதப்படுத்தாமல் முறையாகப் பயன்படுத்துமாறு சம்பந்தப்பட்ட அதிகாரிகள் வேண்டுகோள் விடுத்துள்ளனர்.இந்த புதிய வசதியானது கந்தளாய் பகுதிக்கு வரும் சுற்றுலாப் பயணிகளின் எண்ணிக்கையை அதிகரிப்பதுடன், அப்பகுதி இளைஞர்களிடையே உடற்பயிற்சி குறித்த ஆர்வத்தையும் ஏற்படுத்தும் என எதிர்பார்க்கப்படுகிறது.