3 வாரங்களாகத் தொடரும் உணவு தவிர்ப்பு: ஜனாதிபதியே உயிருக்கு பொறுப்பு சுரேஷ் சலே கடிதம் கொழும்பு தேசிய வைத்தியசாலையில் சிகிச்சை பெற்று வரும் சுரேஷ் சலேவின் உடல்நிலை கவலைக்கிடமாக இருப்பதாகவும், அவர் கைப்பட எழுதியதாகக் கூறப்படும் கடிதம் தொடர்பில் அதிகாரிகள் உடனடியாக நடவடிக்கை எடுக்க வேண்டும் என்றும் அவரது மனைவி தெரிவித்துள்ளார்.நேற்று (27) கொழும்பு தேசிய வைத்தியசாலையில் சுரேஷ் சலேவை பார்வையிட்ட பின்னர் ஊடகங்களுக்கு கருத்து தெரிவிக்கையிலேயே அவர் இதனைக் குறிப்பிட்டார்.அவரின் கூற்றுப்படி, நேற்று காலை சுரேஷ் சலேவுக்கு திடீரென கடுமையான நெஞ்சுவலி ஏற்பட்டதைத் தொடர்ந்து, உடனடியாக இதய சிகிச்சைப் பிரிவுக்கு மாற்றப்பட்டு பல்வேறு மருத்துவ பரிசோதனைகள் மேற்கொள்ளப்பட்டன. அதன் பின்னர், அவருக்கு குறிப்பிட்ட உடல்நலப் பிரச்சினை இருப்பது உறுதி செய்யப்பட்டதுடன், தொடர்ந்து கண்காணிப்பின் கீழ் சிகிச்சை அளிக்கப்பட்டு வருவதாக தெரிவித்தார்.மருத்துவர்களின் மதிப்பீட்டின்படி, மீண்டும் நெஞ்சுவலி ஏற்படும் அபாயம் காணப்படுவதால் தொடர்ச்சியான சிகிச்சை மற்றும் கண்காணிப்பு அவசியம் என அவர் கூறினார்.மேலும், அமைச்சர்கள் அல்லது வெளியிலிருந்து பல்வேறு கருத்துக்கள் முன்வைக்கப்பட்டாலும், அவருக்கு சிகிச்சையளிக்கும் மருத்துவர்களே உண்மையான உடல்நிலையை அறிந்திருப்பதாகவும், சுரேஷ் சலே தற்போது நல்ல நிலையில் இல்லை என்றும் அவரது மனைவி குறிப்பிட்டார்.அதிகாரிகள் சுரேஷ் சலே உயிரிழக்கும் வரை காத்திருக்கிறார்கள் என்ற எண்ணம் தங்களுக்கு ஏற்படுவதாகவும், இருப்பினும் விசாரணைகளை நிறுத்துமாறு தாங்கள் கோரவில்லை என்றும் அவர் தெரிவித்தார். தேவையான அனைத்து விசாரணைகளும், மருத்துவ பரிசோதனைகளும் தொடரலாம் என்றாலும், அவருக்கு உரிய பாதுகாப்பும் சட்ட நடைமுறைகளும் உடனடியாக உறுதிப்படுத்தப்பட வேண்டும் என்பதே தங்களது கோரிக்கை எனவும் கூறினார்.அத்துடன், கடந்த புதன்கிழமை சட்டத்தரணி அவரைச் சந்தித்தபோது, சுரேஷ் சலே தனது கைப்பட எழுதியதாகக் கூறப்படும் கடிதம் ஒன்றை வழங்கியிருந்ததாகவும், அதில் தனக்கு ஏதேனும் அசம்பாவிதம் ஏற்பட்டால் அதற்குப் பொறுப்பேற்க வேண்டியது ஜனாதிபதி, ரவி, ஷானி மற்றும் மேலும் சில அதிகாரிகள் என குறிப்பிடப்பட்டிருந்ததாகவும் அவர் தெரிவித்தார்.இந்த விடயத்தை அதிகாரிகள் மிகுந்த முக்கியத்துவத்துடன் எடுத்துக்கொண்டு உடனடி நடவடிக்கை எடுக்க வேண்டும் என்றும், தற்போதைய நிலையில் சுரேஷ் சலேவின் உடல்நிலை எந்த நேரத்திலும் மேலும் மோசமடையக்கூடிய அபாயம் இருப்பதாகவும் அவர் எச்சரித்தார்.