ஈரானின் குற்றச்சாட்டை UAE திட்டவட்டமாக மறுப்பு ஐக்கிய அரபு அமீரகத்தில் உள்ள அல் மின்ஹாத் விமானப்படைத் தளம் மீது ஏவுகணைத் தாக்குதல் நடத்தப்பட்டதாக ஈரான் முன்வைத்த குற்றச்சாட்டை, ஐக்கிய அரபு அமீரகத்தின் பாதுகாப்பு அமைச்சகம் திட்டவட்டமாக நிராகரித்துள்ளது.அல் மின்ஹாத் விமானப்படைத் தளம் ஏவுகணைகளால் குறிவைக்கப்பட்டதாக வெளியான தகவல்கள் “பொய்யானவை” என அமீரக பாதுகாப்பு அமைச்சகம் தெரிவித்துள்ளது.இதற்கு முன்னதாக, ஈரானிய அரசு தொலைக்காட்சி வெளியிட்ட செய்தியில், லராக் தீவு மீது நடத்தப்பட்ட தாக்குதலுக்கு பதிலடியாக அல் மின்ஹாத் விமானப்படைத் தளம் மீது ஈரான் தாக்குதல் நடத்தியதாகக் கூறப்பட்டது.குறிப்பாக, லராக் தீவில் ஈரானிய இஸ்லாமியப் புரட்சிகர பாதுகாப்புப் படை (IRGC) வீரர்கள் மற்றும் பொதுமக்கள் உயிரிழந்ததற்கு பதிலடியாக, அல் மின்ஹாத் தளம் ஆளில்லா விமானங்கள் மூலம் குறிவைக்கப்பட்டதாக ஈரான் தரப்பு தெரிவித்திருந்தது.ஆனால், இந்தக் கூற்றை மறுத்துள்ள ஐக்கிய அரபு அமீரகம், அல் மின்ஹாத் தளம் மீது ஏவுகணைத் தாக்குதல் நடைபெற்றதாக வெளியான ஊடகச் செய்திகள் உண்மைக்கு புறம்பானவை என விளக்கம் அளித்துள்ளது.இந்த பரஸ்பர குற்றச்சாட்டுகள், அமெரிக்கா–ஈரான் மோதலின் பின்னணியில் வளைகுடா பிராந்தியத்தில் பதற்றம் மேலும் அதிகரித்துள்ளதை வெளிப்படுத்துகின்றன. குறிப்பாக, அமெரிக்க இராணுவத் தளங்கள் அமைந்துள்ள வளைகுடா நாடுகள் தொடர்பான பாதுகாப்பு நிலைமை தற்போது சர்வதேச அளவில் உன்னிப்பாகக் கண்காணிக்கப்பட்டு வருகிறது.