கிளிநொச்சியில் மர்ம நபர்களால் கடத்தப்பட்ட இளம் பெண். கிளிநொச்சியில் அடையாளம் தெரியாத நபர்களினால் 26 வயதான  இளம் பெண் ஒருவர் கடத்தப்பட்ட சம்பவம் அப் பகுதியில் பெரும் பரபரப்பை ஏற்படுத்தியுள்ளது.கிளிநொச்சி பொலிஸ் பிரிவிற்குட்பட்ட கனகாம்பிகை குளம் முன்பாக இன்று மாலை 6 மணியளவில் இச்சம்பவம் இடம்பெற்றுள்ளது.இச் சம்பவம் தொடர்பில் மேலும் தெரியவருவதாவது,யாழ்ப்பாணம் புன்னாலைக்கட்டுவான் பகுதியைச் சேர்ந்த இளம் பெண் ஒருவர் அழகுக் கலை நிலையம் ஒன்றில் பயிற்சி பெற்று வரும் நிலையில் கனகாம்பிகைக்குளம் பகுதியில் உள்ள வீடு ஒன்றில் வாடகைக்கு இருந்துள்ளார்.இந்த நிலையில் வழமை போன்று குறித்த இளம் பெண், தான் தங்கும் இடத்துக்கு திரும்பிக் கொண்டிருந்த சமயம்,  வான் ஒன்றில் சென்ற குழுவினர் கட்டாயப்படுத்தி குறித்த பெண்ணை ஏற்றி சென்றுள்ளதாக ஆரம்ப விசாரணையில் தெரியவந்துள்ளது.அதேவேளை, குறித்த பெண்ணின் கைப்பை மற்றும் தொலைபேசி ஆகியன கண்டெடுக்கப்பட்ட நிலையில் பொலிசாருக்கு தகவல் வழங்கப்பட்டுள்ளது.இதனைத் தொடர்ந்து சம்பவ இடத்துக்கு சென்ற தலைமைப் பொலிஸ் நிலைய பொறுப்பதிகாரி சரத் சமரவிக்ரம தலைமையிலான பொலிசார் விசாரணைகளை ஆரம்பித்துள்ளனர்.குறித்த சம்பவம் திட்டமிட்டு இடம்பெற்றுள்ளமை கண்டறியப்பட்ட நிலையில், பூர்வாங்க விசாரணைகள் குற்றத்தடுப்பு பொலிசாரால் முன்னெடுக்கப்பட்டு வருகின்றமை குறிப்பிடத்தக்கது.