கடந்த 24 மணி நேரத்தில் வீதி விபத்துகளில் பெண்கள் உட்பட 5 பேர் பலி கடந்த 24 மணி நேரத்தில் நாட்டின் பல பகுதிகளில் இடம்பெற்ற பல்வேறு வீதி விபத்துக்களில் இரண்டு பெண்கள் உட்பட ஐந்து பேர் உயிரிழந்துள்ளனர். இந்த விபத்துக்கள் நேற்று தம்புத்தேகம, கஹவத்தை, சிரிபுர, கொக்காவெவ மற்றும் மாத்தறை ஆகிய பொலிஸ் பிரிவுகளில் பதிவாகியுள்ளன. தம்புத்தேகம 27 சந்தி வீதியில், லுனுவெவ பிரதேசத்தில், லொரி ஒன்றை மோட்டார் சைக்கிள் முந்திச் செல்ல முற்பட்டபோது, எதிர்த் திசையில் வந்த தனியார் பஸ்ஸுடன் மோதியதில் விபத்து ஒன்று ஏற்பட்டது. இந்த விபத்தில் காயமடைந்த மோட்டார் சைக்கிள் ஓட்டுநர் மற்றும் பின்னால் பயணித்தவர் தம்புத்தேகம வைத்தியசாலையில் அனுமதிக்கப்பட்டபோது, பின்னால் பயணித்தவர் உயிரிழந்தார். உயிரிழந்தவர் நொச்சியாகம, லபனாவ காலனிப் பிரதேசத்தைச் சேர்ந்த 26 வயதுடைய இளைஞர் என தெரிவிக்கப்படுகிறது. இதேவேளை, மாகந்துரையில் இருந்து மாதம்பே சந்தி ஊடாக கஹவத்தை நோக்கிப் பயணித்த தனியார் பஸ்ஸில் பயணித்த ஒரு பெண், பாபொல்எல்ல பிரதேசத்தில் பஸ்ஸில் இருந்து இறங்க முற்பட்டபோது தவறி விழுந்து, அதே பஸ்ஸில் சிக்குண்டு உயிரிழந்தார். உயிரிழந்த பெண், கஹவத்தை, மாக்கந்துர சபர பகுதியைச் சேர்ந்த 68 வயதுடையவர் ஆவார். இதேவேளை, சிரிபுர - நுவரகல வீதியில், பலுதெனிய பிரதேசத்தில், மோட்டார் சைக்கிள் ஒன்று கிளை வீதிக்குத் திரும்ப முற்பட்டபோது, பின்னால் வந்த மற்றுமொரு மோட்டார் சைக்கிள் மோதியதில் விபத்து ஒன்று ஏற்பட்டது. விபத்தில் காயமடைந்த மோட்டார் சைக்கிள் ஓட்டுநரும், பின்னால் பயணித்த பெண்ணும் தெஹியத்தகண்டிய வைத்தியசாலையில் அனுமதிக்கப்பட்ட நிலையில், பின்னால் பயணித்த பெண் உயிரிழந்தார். உயிரிழந்தவர் சிரிபுர, பலுதெனிய பிரதேசத்தைச் சேர்ந்த 54 வயதுடையவர். மோட்டார் சைக்கிள் ஓட்டுநர் மேலதிக சிகிச்சைக்காகப் பொலன்னறுவை வைத்தியசாலைக்கு மாற்றப்பட்டுள்ளார். இதேவேளை, கொக்காவெவ பொலிஸ் பிரிவில், கிவுலேகட வீதியில், வீதியில் விழுந்திருந்த மரக்கிளையொன்றுடன் மோட்டார் சைக்கிள் மோதியதில் விபத்து ஒன்று ஏற்பட்டது. விபத்தில் காயமடைந்த மோட்டார் சைக்கிள் ஓட்டுநர் கலென்பிந்துனுவெவ வைத்தியசாலையில் சிகிச்சை பெற்று வந்த நிலையில் உயிரிழந்தார். உயிரிழந்தவர் கொக்காவெவ, இஹலபொரலுகொடெல்ல பிரதேசத்தைச் சேர்ந்த 69 வயதுடையவர் ஆவார். இதேவேளை, மாத்தறை பொலிஸ் பிரிவில், வெலேவத்த - நாவிமன வீதியில், பெலிகஸ் சந்திப் பகுதியில் முச்சக்கர வண்டியுடன் எதிர்த் திசையில் வந்த மோட்டார் சைக்கிள் மோதியதில் விபத்து ஏற்பட்டது. விபத்தில் காயமடைந்த முச்சக்கர வண்டி சாரதி மற்றும் மோட்டார் சைக்கிள் ஓட்டுநர் மாத்தறை வைத்தியசாலையில் சிகிச்சை பெற்று வந்த நிலையில், மோட்டார் சைக்கிள் ஓட்டுநர் உயிரிழந்தார். உயிரிழந்தவர் மாலகொட, நாவிமன பிரதேசத்தைச் சேர்ந்த 82 வயதுடையவர் ஆவார்.