அடிக்கடி கண்களைக் கசக்கும் சிறுவர்களுக்கு ஆபத்து அடிக்கடி கண்களைக் கசக்கும் பழக்கம், குறிப்பாக ஒவ்வாமையால் கண் அரிப்பு ஏற்படும் சிறுவர்கள் மற்றும் இளைஞர்களிடையே, பார்வையைப் பாதிக்கக்கூடிய கெரட்டோகோனஸ் (Keratoconus) எனப்படும் கண் நோய் ஏற்படுவதற்கும், அதன் தீவிரம் அதிகரிப்பதற்கும் காரணமாக அமையலாம் எனக் கண் மருத்துவ நிபுணர்கள் எச்சரித்துள்ளனர்.உலக கெரட்டோகோனஸ் தினத்தை முன்னிட்டு, கண் சிகிச்சை நிபுணர் மருத்துவர் குசும் ரத்நாயக்க இந்த எச்சரிக்கையை விடுத்துள்ளார். இலங்கையில் பாடசாலை மாணவர்கள் உள்ளிட்ட சிறுவர்களிடையே இந்நோய் அதிகரித்து வருவதாகவும், ஏழு வயதுடைய சிறுவர்களிடமும் நோய் கண்டறியப்பட்டுள்ளதாகவும் தேசிய கண் வைத்தியசாலை தெரிவித்துள்ளது.கண்ணின் முன்பகுதியில் உள்ள ஒளி ஊடுருவும் கருவிழிப் படலம் படிப்படியாக மெலிந்து, கூம்பு வடிவில் வெளிப்புறமாக வளைவதே கெரட்டோகோனஸ் நோயாகும். இதனால் பார்வை மங்குவதுடன், பொருட்கள் உருக்குலைந்து அல்லது தெளிவற்றுத் தோன்றும் பாதிப்புகளும் ஏற்படலாம்.பொதுவாக 15 முதல் 25 வயதுக்குட்பட்டவர்களிடையே அதிகம் காணப்படும் இந்த நோய், தற்போது ஏழு அல்லது எட்டு வயதுடைய சிறுவர்களிடமும் கண்டறியப்படுவது மருத்துவத் துறையினரிடையே கவலையை ஏற்படுத்தியுள்ளது.கவனிக்க வேண்டிய முக்கிய அறிகுறிகள்:பார்வை மங்கலாகத் தெரிதல்.இரவு நேரங்களில் பார்ப்பதில் சிரமம்.விளக்குகளைச் சுற்றி ஒளிவட்டங்கள் தோன்றுதல்.இரு கண்களிலும் பார்வைத் தெளிவில் வேறுபாடு காணப்படுதல்.கண் அரிப்பு அல்லது வறட்சி ஏற்படும்போது கண்களைக் கசக்குவதைத் தவிர்த்து, உரிய மருத்துவ ஆலோசனையைப் பெற்றுக்கொள்ளுமாறு நிபுணர்கள் அறிவுறுத்துகின்றனர்.நோயின் ஆரம்ப நிலையில் கண்ணாடிகள் மூலமும், தீவிரமடையும் சந்தர்ப்பங்களில் விசேட தொடர்பு வில்லைகள் மூலமும் பார்வையைச் சீராக்க முடியும். கருவிழிப் படலத்தை வலுப்படுத்தும் கொலாஜன் குறுக்கு இணைப்பு சிகிச்சை (Corneal Cross-linking) மூலம் நோய் மேலும் தீவிரமடைவதைத் தடுக்க முடியும். முற்றிய நிலையில் கருவிழி மாற்று அறுவைச் சிகிச்சை தேவைப்படலாம்.எனவே, சிறுவர்கள் அடிக்கடி கண்களைக் கசக்குதல், கண்ணாடிகளை அடிக்கடி மாற்ற வேண்டிய நிலை அல்லது பார்வைக் குறைபாடுகள் போன்ற அறிகுறிகளை வெளிப்படுத்தினால், அவற்றைப் புறக்கணிக்காமல் உடனடியாகக் கண் மருத்துவப் பரிசோதனைக்கு உட்படுத்துமாறு பெற்றோரிடம் மருத்துவ நிபுணர்கள் வலியுறுத்தியுள்ளனர்.