என் குழந்தை அழுதால் மன்னிச்சிடுங்க-100 பயணிகளுக்கு தந்தைகொடுத்த சர்ப்ரைஸ் சீனாவில், தனது 8 மாத குழந்தை விமானப் பயணத்தின்போது அழுது மற்ற பயணிகளுக்கு இடையூறு ஏற்படுத்தக் கூடாது என்பதற்காக, தந்தை ஒருவர் முன்கூட்டியே 100 ஜோடி காது அடைப்பான்களை வாங்கி பயணிகளுக்கு வழங்கிய சம்பவம் இணையத்தில் கவனம் பெற்றுள்ளது.ஹூபேய் மாகாணத்திலிருந்து குவாங்சி நோக்கி இரவு விமானத்தில் பயணித்த சென் என்ற இளம் தந்தையே இந்த மனிதநேய செயலை மேற்கொண்டுள்ளார்.விமானம் புறப்படும் மற்றும் தரையிறங்கும் நேரங்களில் ஏற்படும் காற்றழுத்த மாற்றத்தால் குழந்தை அழக்கூடும் என அவர் எதிர்பார்த்துள்ளார். இதனால், பயணத்திற்கு ஒரு வாரத்திற்கு முன்பே 100 ஜோடி காது அடைப்பான்களை வாங்கி வைத்திருந்ததாக தெரிவிக்கப்படுகிறது.விமானத்தில் ஏறிய பின்னர், காது அடைப்பான்கள் அடங்கிய பையுடன் ஒவ்வொரு பயணியிடமும் சென்று, தனது குழந்தை அழுதால் முன்கூட்டியே மன்னிப்பு கேட்டதுடன், சத்தத்தைக் குறைக்க காது அடைப்பான்களையும் வழங்கியுள்ளார்.தந்தையின் இந்த அக்கறையைப் பார்த்த பயணிகள் பலரும் நெகிழ்ந்துள்ளனர். குழந்தை அழுவது இயல்பானது என்றும், அதற்காக அவர் கவலைப்படத் தேவையில்லை என்றும் சிலர் அவருக்கு ஆறுதல் கூறியுள்ளனர்.இதனால் அவர் கொண்டு வந்த 100 ஜோடி காது அடைப்பான்களில் சுமார் 20 ஜோடிகள் மட்டுமே பயணிகளால் பெற்றுக்கொள்ளப்பட்டன. மீதமிருந்தவற்றைத் திரும்பும் பயணத்தில் பயன்படுத்திக்கொள்ளுமாறு விமானப் பணியாளர்களிடம் அவர் ஒப்படைத்துள்ளார்.மேலும், இணையத்தில் இதுபோன்ற பொதுநல அக்கறை கொண்ட செயல்களைப் பார்த்ததே தனக்கு இந்த யோசனையை வழங்கியதாக சென் தெரிவித்துள்ளார்.அதிர்ஷ்டவசமாக, அந்த 8 மாத குழந்தை முழுப் பயணத்திலும் மிகவும் அமைதியாக இருந்ததாகவும் கூறப்படுகிறது.