மோட்டார் சைக்கிள்களில் செல்லும் பெண்களிடமிருந்து தங்க நகைகளை கொள்ளையடித்த கும்பல் கைது மோட்டார் சைக்கிள்களில் செல்லும் பெண்களிடமிருந்து தங்க நகைகளை திருடிச் சென்றிருந்த கும்பலொன்றை தம்புத்தேகம பொலிஸ் நிலைய குற்றப்பிரிவு அதிகாரிகள் இன்று (15) கைது செய்தனர். ராஜாங்கனை பிரதேசத்தில் பக்க கண்ணாடி மற்றும் இலக்கத்தகடுகள் இல்லாமல் பயணித்த மோட்டார் சைக்கிள் குறித்து சந்தேகமடைந்த பொலிஸ் அதிகாரிகள் விசாரணைகளை மேற்கொண்ட போது, ​​அது திருடப்பட்ட மோட்டார் சைக்கிள் என்பது தெரியவந்தது. அதன்படி, மோட்டார் சைக்கிளில் சென்ற இரண்டு சந்தேக நபர்களும் கைது செய்யப்பட்டதோடு, அவர்களிடம் முன்னெடுக்கப்பட்ட விசாரணையில் பெண் உள்ளிட்ட மேலும் மூன்று சந்தேக நபர்களையும் பொலிஸார் கைது செய்தனர்.சந்தேக நபர்களிடமிருந்து இரண்டு கூர்மையான ஆயுதங்கள், திருடப்பட்ட இலக்கத் தகடுகள் மற்றும் பக்க கண்ணாடிகள் இல்லாத மூன்று மோட்டார் சைக்கிள்களை பொலிஸார் பறிமுதல் செய்துள்ளனர்.சந்தேக நபர்கள் வீதியில் மோட்டார் சைக்கிள்களில் செல்லும் பெண்களிடமிருந்து தங்க நகைகளைத் திருட மோட்டார் சைக்கிள்களைப் பயன்படுத்தி வந்துள்ளதாக பொலிஸ் விசாரணைகளில் தெரியவந்துள்ளது. பொலிஸார் முன்னெடுத்த விசாரணைகளுக்கு அமைவாக, அனுராதபுரம், கல்கமுவ, வாஹல்கட, கஹடகஸ்திகிலிய மற்றும் தலாவ ஆகிய பகுதிகளில் இருந்து திருடப்பட்ட மூன்று மோட்டார் சைக்கிள்கள் மற்றும் தங்க நகைகள் ஐந்தும் பறிமுதல் செய்யப்பட்டுள்ளன. சந்தேக நபர்கள் தம்புத்தேகம நீதவான் நீதிமன்றத்தில் ஆஜர்படுத்தப்பட உள்ளனர். தம்புத்தேகம பொலிஸ் நிலைய குற்றப் புலனாய்வு பிரிவு அதிகாரிகளால் மேலதிக விசாரணைகள் மேற்கொள்ளப்பட்டு வருகின்றன.