உணவுக் கிருமிகளை பரப்பாத வழி: இறைச்சியை கையாளும் சரியான முறைகள் சமைப்பதற்கு முன் கோழி இறைச்சியை கழுவ வேண்டுமா என்ற கேள்வி, சமூக வலைதளங்களில் தற்போது பெரிய விவாதமாக மாறியுள்ளது.பல மேற்கத்திய நாடுகளில் பின்பற்றப்படும் அதிகாரப்பூர்வ உணவுப் பாதுகாப்பு வழிகாட்டுதல்கள், பச்சைக் கோழியை ஒருபோதும் கழுவ வேண்டாம் என்று தெளிவாக அறிவுறுத்துகின்றன. காரணம், அவ்வாறு கழுவும் போது தீங்கு விளைவிக்கும் பாக்டீரியாக்கள் சமையலறை முழுவதும் பரவக்கூடும் என்பதே. இருப்பினும், உலகின் பல பகுதிகளில் கோழி இறைச்சியை கழுவுவது நீண்ட காலமாகப் பின்பற்றப்படும் ஒரு பண்பாட்டு பழக்கமாக இருந்து வருகிறது. இது சுத்தம், பராமரிப்பு மற்றும் வீட்டுச் சமைப்பின் அடையாளமாகவும் பார்க்கப்படுகிறது.இந்த விவாதம் சமூக வலைதளங்களில் மேலும் தீவிரமடைந்துள்ளது. ஜமைக்காவைச் சேர்ந்த தொலைக்காட்சி சமையல் கலைஞரும் எழுத்தாளருமான ஏப்ரல் ஜாக்சன், இந்தச் சர்ச்சையை ஆன்லைனில் கிளப்புவதை ரசிப்பதாகக் கூறுகிறார். சில வீடியோக்களில், கோழியை கழுவும் காட்சிகளை வேண்டுமென்றே சேர்ப்பதாகவும், அதற்குக் கீழே வரும் விமர்சனங்களும் விவாதங்களும் தனக்கு நன்கு தெரியும் என்றும் அவர் தெரிவிக்கிறார். மறுபுறம், கோழியை கழுவாமல் சமைத்தால் அது சுகாதாரமற்றது என்ற நம்பிக்கையும் பலரிடையே வலுவாக உள்ளது. குறிப்பாக ஆசியா, கரீபியன், தென் அமெரிக்கா, ஆப்பிரிக்கா மற்றும் சில மத்திய தரைக்கடல் நாடுகளில் இந்தக் கருத்து பல குடும்பங்களில் வேரூன்றியுள்ளது.இந்தப் பின்னணியில்,பச்சைக் கோழியில் கேம்பிலோபாக்டர் மற்றும் சால்மோனெல்லா போன்ற பாக்டீரியாக்கள் இயற்கையாகவே இருப்பதாக உணவு நுண்ணுயிரியல் நிபுணர்கள் கூறுகின்றனர். பிரிட்டனின் ரீடிங் பல்கலைக்கழகத்தைச் சேர்ந்த முனைவர் கிமோன்-ஆண்ட்ரியாஸ் கராட்சாஸ், கோழியை கழுவும் போது கண்ணுக்குத் தெரியாத நுண்ணுயிர்கள் தண்ணீர் துளிகளுடன் பரவி, சமையலறை மேடை, சிங்க், பாத்திரங்கள் மற்றும் அருகில் உள்ள உணவுகளின் மீது படியக்கூடும் என்று எச்சரிக்கிறார்.இதனை விளக்கும் வகையில் மேற்கொள்ளப்பட்ட ஒரு பரிசோதனையில், பச்சைக் கோழியின் மீது ஒரு வேதிப்பொருள் பயன்படுத்தப்பட்டது. அது பாக்டீரியாக்களை புற ஊதா ஒளியின் மூலம் காண உதவியது.அந்தக் கோழியை சில விநாடிகள் குழாய் நீரில் கழுவியதும், நீர் சிங்கைச் சுற்றி தெறித்து பறந்தது. வெறும் கண்ணால் பார்க்கும்போது, அவை சாதாரண நீர்த்துளிகள் போலத் தோன்றின. ஆனால் புற ஊதா ஒளியில் பார்க்கும்போது, அந்தத் துளிகள் சமையல் மேடை, ஆய்வகக் கோட், கேமரா மற்றும் பச்சையாகச் சாப்பிடப்படும் லெட்டியூஸ், கேரட் போன்ற உணவுகளின் மீது பாக்டீரியாக்களை பரப்பியிருந்தது. இதுவே ‘குறுக்கு-மாசுபாடு’ என அழைக்கப்படுகிறது.இதன் பொருள், கோழி இறைச்சியை நன்றாகச் சமைத்தாலும், அதைக் கழுவும் போது பரவிய கிருமிகள் மற்ற உணவுகளின் மூலம் மனித உடலுக்குள் சென்று நோயை ஏற்படுத்தக்கூடும் என்பதே. சால்மோனெல்லா மற்றும் கேம்பிலோபாக்டர் தொற்றுகள் ஏற்படுவதற்கான பொதுவான வழிகளில் இதுவும் ஒன்றாகக் கருதப்படுகிறது. உலக சுகாதார அமைப்பின் தகவலின்படி, கேம்பிலோபாக்டர் உலகளாவிய வயிற்றுப்போக்கு நோய்களுக்கான முக்கிய காரணிகளில் ஒன்றாக உள்ளது. குறிப்பாக சிறு குழந்தைகள் மற்றும் முதியவர்கள் இதில் கடுமையாகப் பாதிக்கப்படுவதற்கான வாய்ப்பு அதிகம்.கேம்பிலோபாக்டர் சால்மோனெல்லாவை விட ஆபத்தானதாகக் கருதப்படுகிறது. ஏனெனில், சால்மோனெல்லாவுக்கு எதிரான தடுப்பூசிகள் கோழிகளில் பயன்படுத்தப்பட்டு வரும் நிலையில், கேம்பிலோபாக்டருக்கு இதுவரை எந்தத் தடுப்பூசியும் இல்லை. மேலும், ஒரு தொற்று ஏற்படுவதற்கு தேவையான பாக்டீரியாவின் அளவு மிகவும் குறைவு. ஒரு சிறிய நீர்த்துளியிலேயே டிரில்லியன் கணக்கான கேம்பிலோபாக்டர் பாக்டீரியாக்கள் இருக்கக்கூடும் என்று நிபுணர்கள் எச்சரிக்கின்றனர்.பிரிட்டனில் மட்டும் ஆண்டுதோறும் கால் மில்லியனுக்கும் அதிகமானோர் இந்தத் தொற்றால் பாதிக்கப்படுவதாக அரசின் உணவுத் தர முகமை தெரிவிக்கிறது. பாதிப்பு ஏற்பட்ட இரண்டு முதல் ஐந்து நாட்களுக்குள் ரத்தத்துடன் கூடிய வயிற்றுப்போக்கு, வயிற்றுவலி, காய்ச்சல், வாந்தி போன்ற அறிகுறிகள் தோன்றுகின்றன. சிலருக்கு இந்தத் தொற்று நீண்டகால உடல்நலச் சிக்கல்களுக்கும் வழிவகுக்கலாம். இருப்பினும், பெரும்பாலானோர் தங்களுக்கு ஏற்படும் வயிற்று உபாதைகள், கோழி இறைச்சி தயாரிக்கும் முறையுடன் தொடர்புடையவை என்பதை உணராமல் போகிறார்கள் என நிபுணர்கள் கூறுகின்றனர்.அப்படியென்றால் மக்கள் ஏன் இன்னும் கோழியை கழுவுகிறார்கள் சமீபத்திய ஆய்வுகளின்படி, தென்கிழக்கு ஆசியாவின் பல நாடுகளில் பெரும்பாலானோர் கோழி இறைச்சியை கழுவுவதாகத் தெரிவிக்கின்றனர். மேற்கத்திய நாடுகளிலும் கணிசமான அளவில் மக்கள் இதைப் பின்பற்றுகிறார்கள். சில இடங்களில் கோழி இறைச்சி திறந்தவெளிச் சந்தைகளில் வெட்டப்படுவதாலும், சுகாதார வசதிகள் ஒரே மாதிரியாக இல்லாததாலும், கழுவுவது அவசியம் என்ற நம்பிக்கை உருவாகியுள்ளது. மேலும், பலருக்கு இது வெறும் சுகாதார நடைமுறை மட்டுமல்ல; அது அவர்களின் வளர்ப்பு, கலாச்சாரம் மற்றும் வீட்டுச் சமைப்பின் அடையாளமாகவும் உள்ளது.இருப்பினும், உணவு பாதுகாப்பு நிபுணர்கள் ஒரே கருத்தை வலியுறுத்துகின்றனர். கோழி இறைச்சியை கழுவுவது பாக்டீரியாக்களை அழிக்காது. அவற்றை முற்றிலும் அழிக்கும் ஒரே வழி, கோழியை முழுமையாகவும் நன்றாகவும் சமைப்பதே. மேலும், சந்தையில் விற்கப்படும் கோழி இறைச்சி பெரும்பாலும் ஏற்கனவே சுத்தம் செய்யப்பட்ட நிலையிலேயே இருக்கும். எனவே, அதை மீண்டும் கழுவுவது தேவையற்றது மட்டுமல்ல, ஆபத்தானதும் கூட என அவர்கள் எச்சரிக்கின்றனர்.