குழந்தைகளுக்கு இனிப்பு கொடுக்கலாமா ஆரோக்கியத்தை தீர்மானிக்கும் எது குழந்தைகளுக்கு அதிக அளவில் சர்க்கரை வழங்குவது அவர்களின் எதிர்கால ஆரோக்கியத்தை கடுமையாக பாதிக்கக்கூடும் என சமீபத்திய ஆய்வுகள் எச்சரிக்கின்றன.ஜெசிகா பிராட்லி எழுதிய கட்டுரையில், குழந்தைப் பருவ உணவுப் பழக்கங்கள் வாழ்நாள் முழுவதும் ஏற்படுத்தும் தாக்கங்கள் விரிவாக விளக்கப்பட்டுள்ளன.இரண்டாம் உலகப் போரின் போது பிரிட்டனில் நடைமுறையில் இருந்த சர்க்கரை பங்கீட்டு முறையின் தரவுகளை அடிப்படையாகக் கொண்டு மேற்கொள்ளப்பட்ட 2025 ஆம் ஆண்டு ஆய்வில், கருப்பையிலும் வாழ்வின் முதல் 1,000 நாட்களிலும் குறைந்த சர்க்கரைக்கு ஆளான குழந்தைகளுக்கு, பிற்கால வாழ்க்கையில் இருதய நோய் வருவதற்கான வாய்ப்பு 20% குறைவாகவும், இதய செயலிழப்பு 25% குறைவாகவும் இருப்பது கண்டறியப்பட்டுள்ளது. மேலும், பக்கவாதம் ஏற்படும் அபாயமும் 31% வரை குறைவாக இருந்ததாக ஆய்வாளர்கள் தெரிவித்துள்ளனர்.ஊட்டச்சத்து நிபுணர்கள் கூறுவதாவது, குழந்தைப் பருவத்தில் உணவு என்பது உடலையும் மூளையையும் உருவாக்கும் அடித்தளமாகும். இந்தக் காலகட்டத்தில் இரும்புச்சத்து, அயோடின், கால்சியம், வைட்டமின் டி மற்றும் நல்ல தரமான கொழுப்புகள் அவசியம். பழங்கள், காய்கறிகள், முழு தானியங்கள், பருப்பு வகைகள், கொட்டைகள் மற்றும் விதைகள் போன்ற இயற்கை உணவுகள் குழந்தைகளின் வளர்ச்சிக்கு மிகவும் பயனுள்ளதாகக் கருதப்படுகின்றன.பதின்ம வயது மற்றும் 20-களில், எலும்பு மற்றும் தசை வளர்ச்சி முழுமையடைவதால், புரதம், கால்சியம், வைட்டமின் டி மற்றும் இரும்புச்சத்து அதிகம் தேவைப்படுகிறது. இந்த வயதில் மெடிட்டரேனியன் பாணி உணவு முறையான  காய்கறிகள், பருப்பு வகைகள், ஆலிவ் எண்ணெய், மீன் போன்றவை  இதய ஆரோக்கியத்துக்கும் மனநலத்துக்கும் பாதுகாப்பானதாக ஆய்வுகள் தெரிவிக்கின்றன.மத்திய வயதில், குறிப்பாக பெண்களுக்கு மாதவிடாய் நிற்கும் காலத்தை நெருங்கும் போது, இதய ஆரோக்கியம் மற்றும் எலும்பு வலிமை முக்கிய முன்னுரிமைகளாகின்றன. ஒமேகா-3 கொழுப்புகள், புரதம் மற்றும் நிறைவுறாக் கொழுப்புகள் நிறைந்த உணவுகள் இந்த அபாயங்களை குறைக்க உதவுகின்றன.முதுமையில், உடலின் ஆற்றல் தேவைகள் குறைந்தாலும், கால்சியம், வைட்டமின் டி மற்றும் தரமான புரதம் அவசியம். இதேவேளை, குடல் நுண்ணுயிரி மண்டலத்தில் ஏற்படும் மாற்றங்களை சமநிலைப்படுத்த நார்ச்சத்து மற்றும் பாலிஃபீனால்கள் நிறைந்த உணவுகளைச் சேர்த்துக்கொள்ள வேண்டும் என நிபுணர்கள் அறிவுறுத்துகின்றனர்.குழந்தைகளுக்கு ஆரம்ப வயதிலேயே அதிக சர்க்கரை வழங்குவது, அவர்களின் எதிர்கால ஆரோக்கியத்தை பாதிக்கும் முக்கிய காரணியாகும். வயதுக்கேற்ற உணவு முறையைப் பின்பற்றுவதன் மூலம் இதய நோய், நீரிழிவு, எலும்புப்புரை போன்ற பல அபாயங்களை குறைக்க முடியும். ஆகவே, “சர்க்கரையை குறைத்து, சத்தான உணவை அதிகரிப்பதே” ஆரோக்கியமான வாழ்க்கைக்கான உண்மையான முதலீடு என நிபுணர்கள் வலியுறுத்துகின்றனர்.