லெபனானில் தொடரும் இஸ்ரேலின் அதிரடி- 4 முக்கிய பேராளிகள் பலி ஈரான் மற்றும் அமெரிக்காவுக்கு இடையே பிராந்தியப் போரை முடிவுக்குக் கொண்டுவர அமைதி உடன்படிக்கை எட்டப்பட்டதாக அறிவிப்புகள் வெளியாகியுள்ள நிலையிலும், தெற்கு லெபனானில் பதற்றம் நீடித்து வருகிறது. அங்கு இஸ்ரேலிய பாதுகாப்புப் படைகள் (IDF) நடத்திய புதிய வான்வழித் தாக்குதல்களில், ஈரான் ஆதரவு பெற்ற ஹிஸ்புல்லா அமைப்பைச் சேர்ந்த நான்கு பேர் கொல்லப்பட்டுள்ளனர்.மத்திய கிழக்கு பிராந்தியத்தில் நிலவும் தீவிரப் பதற்றங்களுக்கு மத்தியில், தெற்கு லெபனானில் இஸ்ரேலிய இராணுவத்தினர் தொடர்ந்து தங்களது தேடுதல் மற்றும் தாக்குதல் நடவடிக்கைகளை மேற்கொண்டு வருகின்றனர். இதன் ஒரு பகுதியாக, ஹிஸ்புல்லா இலக்குகளைக் குறிவைத்து நடத்தப்பட்ட அண்மைக்காலத் தாக்குதல்களில் நான்கு முக்கியப் போராளிகள் கொல்லப்பட்டதை இஸ்ரேல் உறுதிப்படுத்தியுள்ளது.ஈரானின் அச்சுறுத்தல்களுக்கும் எச்சரிக்கைகளுக்கும் அடிபணியப் போவதில்லை எனத் தெரிவித்துள்ள இஸ்ரேல், தங்கள் நாட்டு மக்களின் பாதுகாப்பை உறுதி செய்யும் வரை ஹிஸ்புல்லாவுக்கு எதிரான இராணுவ நடவடிக்கைகள் தொடரும் எனத் திட்டவட்டமாகக் கூறியுள்ளது.அமெரிக்கா மற்றும் பாகிஸ்தான் ஆகியவற்றின் மத்தியஸ்தத்தில் எட்டப்பட்ட அமைதி முயற்சிகளுக்கு மத்தியிலும், தெற்கு லெபனானில் நிலைநிறுத்தப்பட்டுள்ள இஸ்ரேலியப் படைகளைக் குறிவைத்து ஹிஸ்புல்லா அமைப்பினர் ராக்கெட் மற்றும் ட்ரோன் (UAV) தாக்குதல்களை நடத்தி வருகின்றனர்.இஸ்ரேலியப் படைகள் மீது ஏவப்பட்ட ராக்கெட்டுகளைத் தங்களது வான்பாதுகாப்பு அமைப்பு இடைமறித்து அழித்ததாகக் குறிப்பிட்டுள்ள இஸ்ரேல், அந்த ராக்கெட்டுகள் ஏவப்பட்ட தளங்கள் மீதும், சந்தேகத்திற்கிடமான வாகனங்கள் மீதும் வான்வழித் தாக்குதல்களை நடத்தி அவற்றை முழுமையாக முறியடித்துள்ளதாகத் தெரிவித்துள்ளது.