ஆசிரியர்களின் சுகயீன விடுமுறை போராட்டம். மனசாட்சிப்படி செயற்படுமாறு கல்வி இராஜாங்க அமைச்சர் ஆலோசனை. தற்போதைய கல்வி சீர்திருத்த நடவடிக்கையின் மூலம் இந்நாட்டின் கல்வித்துறையில் பெரும் வளர்ச்சியை ஏற்படுத்த முடியும் என கல்வி இராஜாங்க அமைச்சர் அரவிந்தகுமார்  தெரிவித்துள்ளார்.இந்நாட்டின் எதிர்கால சந்ததியை உருவாக்கும் கௌரவமான சேவையாக ஆசிரியர்களுக்கு பெரும் பொறுப்பு வழங்கப்பட்டுள்ளதால், ஆசிரியர்கள் அனைவரும் அதனை சரியாக புரிந்துகொண்டு மனசாட்சிப்படி செயற்படுமாறு இராஜாங்க அமைச்சர் கேட்டுக்கொண்டார்.நிலையான நாட்டிற்கு ஒரு வழி என்ற தொனிப்பொருளில் நேற்றையதினம்(12) ஜனாதிபதி ஊடக மையத்தில் நடைபெற்ற செய்தியாளர் சந்திப்பில் கலந்துகொண்டு கருத்து தெரிவிக்கும் போதே கல்வி இராஜாங்க அமைச்சர் இவ்வாறு தெரிவித்தார்.தற்போதைய கல்விச் சீர்திருத்தச் செயற்பாட்டின் ஊடாக இந்நாட்டில் கல்வித்துறையில் இதுவரை இல்லாத பெரும் வளர்ச்சி ஏற்படும் என நம்புகின்றோம். ஐநூறுக்கும் மேற்பட்ட கொரிய, ஜெர்மன், பிரெஞ்சு, ஹிந்தி, சீன மற்றும் ஜப்பானிய மொழி ஆசிரியர்கள் பணியமர்த்தப்பட்டு பாடசாலைகளுக்கு அனுப்பப்பட்டுள்ளனர்.மேலும், இந்த நாட்டில் உள்ள 19 கல்வியியற் கல்லூரிகளையும் பல்கலைக்கழகங்களாக மாற்றுவோம் என்று நம்புகிறோம். அந்தப் பல்கலைக்கழகங்களில் இருந்து 04 வருடங்களின் பின்னர் பட்டதாரி ஆசிரியர்கள் உருவாக்கப்படுவார்கள்.இதன் மூலம் கல்வியியற் கல்லூரிகளில் சேரும் 5,000 மாணவர்களின் எண்ணிக்கை 7,500 ஆக உயரும் என எதிர்பார்க்கப்படுகிறது. அதன்படி, ஆண்டுதோறும் 7500 பட்டதாரி ஆசிரியர்கள்  உருவாக்கப்படுவார்கள். மேலும், விசேட தேவையுடைய மாணவர்களுக்கான பாடசாலைகளில் வசதிகளை மேலும் அதிகரிக்க முயற்சிகள் மேற்கொள்ளப்பட்டு வருவதுடன் அவர்களுக்கான பயிற்சி பெற்ற ஆசிரியர்களும் நியமிக்கப்பட்டுள்ளனர்.ஜனாதிபதி ரணில் விக்கிரமசிங்கவின் பணிப்புரையின் பிரகாரம் கல்வித்துறையின் இந்த சீர்திருத்தங்களுக்கு தேவையான நிதி ஒதுக்கீடுகள் கல்வி அமைச்சுக்கு வழங்கப்பட்டுள்ளது. இது தொடர்பில் ஜனாதிபதியின் விசேட கவனம் செலுத்தப்பட்டுள்ளது என்றே கூற வேண்டும்.இந்நிலையில், கடந்த சில நாட்களாக ஆசிரியர்களுக்கு உடல்நலக்குறைவு ஏற்பட்டது. ஆசிரியர் சேவை என்பது இந்நாட்டின் எதிர்கால சந்ததியை உருவாக்கும் துறையாகும். மற்றவர்களை விட அவர்களுக்கு அதிக பொறுப்பு உள்ளது. எனவே, தங்கள் மனசாட்சிப்படி செயல்படுமாறு கேட்டுக்கொள்கிறேன். அத்துடன், பாடசாலைகளில் பணம் அறவிடுவது சட்டவிரோதமானது எனவும் கல்வி அமைச்சு அறிவுறுத்தியுள்ளது. இதற்கு பெற்றோர்களும் துணை நிற்க வேண்டும்.ஆனால், இந்த வேலைநிறுத்தங்கள் தொடர்ந்தால் தொழிற்சங்கங்கள் பெரும் பாதிப்பை சந்திக்க நேரிடும் என்பதை அவர்கள் தற்போது உணர்ந்துள்ளனர். எனவே, அவர்கள் வெவ்வேறு கதைகளைச் சொன்னாலும், அவர்கள் எடுத்த அனைத்து நடவடிக்கைகளும் தோல்வியடைந்தன என்பதுதான் உண்மை  எனவும் தெரிவித்தார்.