குற்றவாளிகள் கையும் களவுமாக பிடித்த ரயில் ரோபோகாப் ரயில்வே பாதுகாப்பில் செயற்கை நுண்ணறிவு (AI) தொழில்நுட்பத்தின் பயனை வெளிப்படுத்தும் வகையில், ரயில் ரோபோகாப் “ASC அர்ஜுன்” நிறுவனத்தின் AI-இயங்கும் முக அங்கீகார அமைப்பு (Face Recognition System – FRS), விசாகப்பட்டினம் ரயில் நிலையத்தில் இரண்டு பழக்கமான குற்றவாளிகளை கைது செய்ய பொலிசாருக்கு உதவியுள்ளது.கண்காணிப்பு மற்றும் இரவு ரோந்துப் பணியில் ஈடுபடுத்தப்பட்டிருந்த இந்த ரோபோகாப், முன்பே ஏற்றப்பட்ட குற்றவாளிகளின் தரவுத்தளத்துடன் முகங்களை ஒப்பிட்டு, இரண்டு சந்தேக நபர்களை நுழைவு கட்டத்திலேயே அடையாளம் கண்டறிந்தது.உடனடியாக RPF CCTV கட்டுப்பாட்டு அறைக்கு எச்சரிக்கை அனுப்பப்பட்டதைத் தொடர்ந்து, தலைமைக் காவலர் பி.எஸ். நாராயணா நேரடி காட்சிகளை ஆய்வு செய்து, வால்டேர் பிரிவின் குற்றத் தடுப்புக் காவல் படையுடன் இணைந்து நடவடிக்கை எடுத்துள்ளார்.அதன் அடிப்படையில் மேற்கொள்ளப்பட்ட ஒருங்கிணைந்த சோதனையில் இருவர்  கைது செய்யப்பட்டனர்.விசாரணையில், இருவரும் ராயகடா பொலிஸ் நிலைய எல்லைக்குட்பட்ட பகுதிகளில் பதிவு செய்யப்பட்ட பல்வேறு குற்ற வழக்குகளில் தொடர்புடைய   குற்றவாளிகள் என்பது உறுதியாகியுள்ளது. திருட்டு, கொள்ளை, ஆயுதங்கள் தொடர்பான வழக்குகள் உள்ளிட்ட பல குற்றங்களில் அவர்கள் ஈடுபட்டிருந்ததாக பொலிசார் தெரிவித்தனர். இந்த சம்பவம், ரயில்வே பாதுகாப்பை மேம்படுத்தவும், குற்றங்களை முன்கூட்டியே தடுக்கும் திறனையும் AI-இயங்கும் கண்காணிப்பு மற்றும் முக அங்கீகார தொழில்நுட்பம் கொண்டுள்ளது என்பதை நிரூபிக்கிறது என கோட்ட ரயில்வே மேலாளர் லலித் போஹ்ரா தெரிவித்துள்ளார்.இதன் மூலம் பயணிகளுக்கு மேலும் பாதுகாப்பான பயணச் சூழல் உருவாக்க முடியும் என அவர் மேலும் கூறினார்.