அமெரிக்க போர் விமானம் மற்றும் ஹெலிஹொப்டர் ; தென் சீன கடலில் அடுத்தடுத்து விபத்தில் சிக்கியதில் பரபரப்பு அமெரிக்க கடற்படைக்கு சொந்தமான விமானம் தாங்கி கப்பலான யுஎஸ்எஸ் நிமிட்ஸில் இருந்து புறப்பட்ட ஒரு போர் விமானமும் ஹெலிகாப்டரும் தென் சீனக் கடலில் 30 நிமிட இடைவெளியில் நேற்று விபத்துக்குள்ளாகின.விபத்துக்குள்ளான எம்ஹெச்-60ஆர் சீ ஹாக் ஹெலிகாப்டரின் மூன்று பணியாளர்களும், எஃப்/ஏ-18எஃப் சூப்பர் ஹார்னெட் போர் விமானத்தின் இரண்டு விமானிகளும் விபத்துக்கு முன் பாதுகாப்பாக வெளியேறியதாக தெரிவிக்கப்படுகின்றது. விமானங்கள் அடுத்தடுத்து விபத்திற்குள்ளான காரணம் இதுவரையில் தெரியாத நிலையில் விசாரணைகள் மேற்கொள்ளப்படுவதாக அமெரிக்க கடற்படை ஒரு அறிக்கையில் தெரிவித்துள்ளது. விபத்திற்குள்ளான  நேரத்தில் விமானம் அங்கு என்ன செய்து கொண்டிருந்தது என்பது  தொடர்பான தகவலும் குறிப்பிடப்படவில்லை.இதற்கிடையே இராணுவப் பயிற்சியின் போது விபத்து நடந்ததாக சீனாவின் வெளியுறவு அமைச்சகம் தெரிவித்துள்ளது.அமெரிக்காவும் சீனாவும் வர்த்தக போரில் ஈடுபட்டுள்ள சூழலில் தென் சீனக் கடலில் அமெரிக்க இராணுவ விமானமும் ஹெலிகாப்டரும் இருப்பது பல கேள்விகளை எழுப்பியுள்ளது.இதேவேளை- இந்த வாரம் தென் கொரியாவில் நடைபெறும் மாநாட்டில் அமெரிக்க ஜனாதிபதி ட்ரம்பும் சீன  ஜனாதிபதி  ஜி ஜின்பிங்கும் சந்திக்கவுள்ளமை குறிப்பிடத்தக்கது. விமானம் மற்றும் ஹெலிகொப்டர் ஆகியவை அடுத்தடுத்து கடலில் விபத்திற்குள்ளான சம்பவம் பரபரப்பை ஏற்படுத்தியுள்ளது.