புழுவின் உடலிலிருந்து முளைக்கும் காளான் சாதாரண காளான்களைவிடப் பல மடங்கு விலை கொண்ட, உலகின் மிக விலையுயர்ந்த இயற்கைப் பொருட்களில் ஒன்றாகக் கருதப்படும் ‘யார்ட்சா குன்பு’ எனப்படும் கம்பளிப்பூச்சி காளான் தற்போது கவனத்தை ஈர்த்துள்ளது.திபெத், நேபாளம், பூட்டான் மற்றும் இந்தியாவின் இமயமலைப் பகுதிகளில் சுமார் 3,000 முதல் 5,000 மீற்றர் உயரத்தில் இந்த அரிய வகைக் காளான் காணப்படுகிறது. இது சாதாரணமாக மண்ணில் வளர்வதில்லை. நிலத்தடியில் வாழும் குறிப்பிட்ட வகைக் கம்பளிப்புழுக்களின் உடலுக்குள் பூஞ்சை ஊடுருவி, அவற்றிலிருந்து ஊட்டச்சத்தைப் பெற்று வளர்ந்து, பின்னர் தரைக்கு மேலே காளானாக முளைக்கிறது.பாரம்பரிய திபெத்திய மருத்துவத்தில் பல நூற்றாண்டுகளாகப் பயன்படுத்தப்பட்டு வரும் இந்தக் காளான், உடல் வலிமை மற்றும் பாலியல் ஆரோக்கியத்தை மேம்படுத்தும் எனப் பலர் நம்புகின்றனர். இதனால் ‘இயற்கை வயாகரா’ என்றும் அழைக்கப்படுகிறது. எனினும், இத்தகைய மருத்துவப் பலன்கள் அனைத்துக்கும் உறுதியான அறிவியல் ஆதாரம் இல்லை.இக்காளானின் அரிதான தன்மை, அதிக சந்தைத் தேவை மற்றும் சேகரிப்பதில் உள்ள சிரமம் ஆகியவை அதன் விலை உயர்வுக்குக் காரணமாகக் கூறப்படுகின்றன. இமயமலையின் கடுமையான குளிரிலும் ஆபத்தான மலைப்பகுதிகளிலும் உள்ளூர் மக்கள் இதனைத் தேடிச் சேகரிக்கின்றனர்.ஒரு கிலோவுக்கு சுமார் 15 இலட்சம் ரூபாய் வரை விலை கிடைப்பதாகக் கூறப்படும் இந்தக் கம்பளிப்பூச்சி காளான், அதன் அபூர்வமான உருவாக்க முறையாலும் அதிக சந்தை மதிப்பாலும் உலகளவில் பெரும் கவனத்தைப் பெற்றுள்ளது.