மின்சார வாகனங்களைப் பயன்படுத்துவோர் கவனத்திற்கு மின்சார வாகனங்களின் பயன்பாடு உலகளவில் அதிகரித்து வரும் நிலையில், நீண்ட தூரப் பயணத்தை முடித்தவுடன் உடனடியாக வாகனத்தைச் சார்ஜ் செய்வது தொடர்பில் நிபுணர்கள் எச்சரிக்கை விடுத்துள்ளனர்.குறிப்பாக, நீண்ட நேரப் பயணத்திற்குப் பிறகு மின்கலன் அதிக வெப்பநிலையில் இருக்கக்கூடும். இத்தகைய நிலையில் உடனடியாகச் சார்ஜ் செய்வதால் வெப்ப அழுத்தம் மேலும் அதிகரித்து, மின்கலனின் செயல்திறன் மற்றும் ஆயுட்காலம் பாதிக்கப்படலாம் என ஆராய்ச்சியாளர்கள் சுட்டிக்காட்டுகின்றனர்.மின்சார வாகனங்களில் பயன்படுத்தப்படும் லித்தியம் அயன் மின்கலன்கள் இயங்கும்போதும் சார்ஜ் செய்யப்படும்போதும் இயல்பாகவே வெப்பத்தை உருவாக்குகின்றன. குறிப்பாக அதிக வெப்பமான காலநிலையில் இந்த வெப்பம் மேலும் அதிகரிக்கக்கூடும். இதனால் மின்கலனின் மின்சாரத்தைச் சேமிக்கும் திறன் படிப்படியாகக் குறைவதுடன், சில தீவிர சூழ்நிலைகளில் பாதுகாப்பு அபாயங்களும் ஏற்படலாம்.இந்தியாவில் கோடைக்கால வெப்பநிலை அதிகரிப்பதைக் கருத்தில் கொண்டு, ஐ.ஐ.டி. மெட்ராஸ் ஆராய்ச்சியாளர்கள் மின்கலன்களின் வெப்பத்தைக் கட்டுப்படுத்தும் புதிய குளிரூட்டும் தொழில்நுட்பங்கள் தொடர்பான ஆய்வுகளை முன்னெடுத்து வருகின்றனர். 35 பாகை செல்சியஸ் அல்லது அதற்கு மேற்பட்ட சுற்றுப்புற வெப்பநிலையில் இயங்கிய 60 அம்பியர்-மணிநேரத் திறன் கொண்ட சில மின்கலன் செல்களின் வெப்பநிலை 45 பாகை செல்சியஸைத் தாண்டியதாக ஓர் ஆய்வில் கண்டறியப்பட்டுள்ளது.எனவே, மின்சார வாகனங்களைப் பயன்படுத்துவோர் உற்பத்தியாளர் வழங்கிய சார்ஜிங் வழிகாட்டுதல்களைப் பின்பற்றுவதுடன், மின்கலனின் வெப்பநிலையைக் கவனிக்கவும், அங்கீகரிக்கப்பட்ட மற்றும் நம்பகமான சார்ஜிங் வசதிகளைப் பயன்படுத்தவும் நிபுணர்கள் வலியுறுத்துகின்றனர். இருப்பினும், ஒவ்வொரு வாகனத்திற்குமான சார்ஜிங் நடைமுறைகள் மாறுபடக்கூடும் என்பதால், பயணத்திற்குப் பிறகு சார்ஜ் செய்வதற்கு முன் வாகனத்தின் கையேட்டில் உள்ள அறிவுறுத்தல்களைப் பின்பற்றுவது அவசியமாகும்.