சீன ஜனாதிபதி ஷி ஜின்பிங் ஒரு சர்வாதிகாரி; ஜோ பைடனின் விமர்சனத்தால் எழுந்துள்ள சர்ச்சை samugammedia சீன ஜனாதிபதி ஷி ஜின் பிங்கை சர்வாதிகாரி என்று அமெரிக்க ஜனாதிபதி ஜோ பைடன் கூறியுள்ளமை சர்வதேச அரசியல் களத்தில் பேசு பொருளாக மாறியுள்ளது.அமெரிக்காவின் சான்பிரான்சிஸ்கோவில் நேற்று நடைபெற்ற 'ஏபிஇசி' (APEC Summit ) பொருளாதார உச்சி நாடுகளின் தலைவர்கள் கூட்டத்தில் சீன ஜனாதிபதி ஷி ஜின்பிங்கும், அமெரிக்க ஜனாதிபதி ஜோ பைடனும் சந்தித்துக் கொண்டனர்.அப்போது இரு நாடுகளுக்கும் இடையிலான பல்வேறு விவகாரங்கள் தொடர்பாக விவாதிக்கப்பட்டது.இந்த சந்திப்பின் போது, இருதரப்பு உறவுகள், பிராந்திய மற்றும் முக்கிய உலகளாவிய பிரச்சினைகளான ஈரான், மத்திய கிழக்கு, உக்ரைன், தைவான், இந்தோ-பசிபிக், பொருளாதார பிரச்சினைகள், செயற்கை நுண்ணறிவு, மருந்துகள் மற்றும் காலநிலை உள்ளிட்ட பல்வேறு விவகாரங்கள் குறித்து இரு தலைவர்களும் விவாதித்தனர் என மூத்த நிர்வாக அதிகாரி ஒருவர் தெரிவித்துள்ளார்.இதையடுத்து ஜோ பைடன் செய்தியாளர்களுக்கு கருத்து வெளியிட்டார். அப்போது பேசிய அவர்,”சீன ஜனாதிபதி ஷி ஜின்பிங்குடனான பேச்சுவார்த்தையில் இருதரப்புக்கும் இடையே ஏற்பட்டுள்ள உறவுகளை சரி செய்வதில் முன்னேற்றம் ஏற்பட்டுள்ளது.நாங்கள் மிகவும் ஆக்கபூர்வமான மற்றும் பயனுள்ள விவாதங்களை மேற்கொண்டோம். நாங்கள் சில முக்கியமான முடிவுகளை செய்துள்ளோம்.ஷி ஜின்பிங்குக்கும் எனக்கும் இடையிலான கருத்து வேறுபாடுகளைக் களைய நேரடியான தொலைபேசி அழைப்பில் இருதரப்பிலும் பேசிக் கொள்வது என்று முடிவு செய்து இருக்கிறோம்." என்றார்.அதைத் தொடர்ந்து செய்தியாளர்கள் அவரிடம், சீன ஜனாதிபதியை இன்னும் சர்வாதிகாரியாகத்தான் நீங்கள் கருதுகிறீர்களா எனக கேட்டனர்.இதற்கு பதிலளித்த ஜோ பைடன்,"ஷி ஜின்பிங், கம்யூனிச நாட்டை வழிநடத்தும் ஒரு சர்வாதிகாரி, மேலும் பிற நாடுகளுடன் ஒப்பிடும் போது சீன அரசாங்கம் முற்றிலும் மாறுபட்டது." என்றார். கடந்த சில மாதங்களுக்கு முன்பு சீன ஜனாதிபதியை சர்வாதிகாரி என்று ஜோ பைடன் விமர்சித்திருந்தது குறிப்பிடத்தக்கது.நேற்றைய தினம் இருவருக்கும் இடையில் ஆக்கப்பூர்வமான சந்திப்பொன்று நடந்த பின்புலத்தில் ஜனாதிபதி பைடன் வெளியிட்டுள்ள இந்த கருத்து சீனாவை அதிருப்திக்கு உள்ளாகியுள்ளது. நிச்சயமாக இதற்கு சீனா எதிர்வினையாற்றும் என சர்வதேச அரசியல் விமர்சகர்கள் தெரிவிக்கின்றனர்.