கடற்கரை மண்ணிற்குள் முடிய நிலையில் சடலம் மீட்பு; களுத்துறையில் சம்பவம் - பொலிஸார் விசாரணை கடற்கரையில் மண்ணிற்குள் மூடிய நிலையில் சடலம் ஒன்று மீட்கப்பட்டுள்ளதாக பொலிஸார் தெரிவித்துள்ளனர். களுத்துறை, கட்டுகுருந்த கடற்கரையிலேயே இவ்வாறு  சந்தேகத்திற்கிடமான முறையில்  சடலம் மீட்கப்பட்டுள்ளது. கடற்கரையில் உடற்பயிற்சி செய்து கொண்டிருந்த தந்தை மற்றும் மகளும் சடலத்தை கண்டுள்ளதாக தெரிவிக்கப்படுகிறது. பின்னர் அவர்கள் 119 அவசர தொலைபேசி இலக்கத்திற்கு அழைத்து தகவல் வழங்கியதையடுத்து களுத்துறை தெற்கு பொலிஸார் விசாரணைகளை ஆரம்பித்துள்ளனர். கடற்கரைக்கு விரைந்த பொலிஸார் நபரொருவர்  குப்புற விழுந்து தலை மண்ணிற்குள் மூடிய நிலையில் சடலம் காணப்பட்டதை  பொலிஸார் அவதானித்தனர். அதன்பின்னர் சடலத்தை மீட்டனர்.  உயிரிழந்தவர் 55 முதல் 60 வயதுக்குட்பட்டவராக இருக்கலாம் என சந்தேகிக்கப்படுவதுடன், அவரது அடையாளம் இன்னும் உறுதிப்படுத்தப்படவில்லை என்று பொலிஸார் தெரிவித்தனர். உயிரிழந்தவர்  கறுப்பு நிற நீண்ட காற்சட்டை மற்றும் வெள்ளை ரீ-சேட் அணிந்திருந்ததாக தெரிவிக்கப்படுகின்றது.    சம்பவம் குறித்து களுத்துறை தெற்கு தலைமையக பொலிஸார் மேலதிக விசாரணைகளை முன்னெடுத்துள்ளனர்.