நுவரெலியா தபால் நிலையம் தொடர்பில் அரசின் புதிய தீர்மானம்  நுவரெலியா தபால் நிலையத்தை சுற்றுலா தலமாக அபிவிருத்தி செய்வதற்கும், தபால் சேவைகளைப் பேணுவதற்கும் அரசாங்கம் திட்டமிட்டுள்ளதாக அமைச்சர் நளிந்த ஜயதிஸ்ஸ தெரிவித்தார்.அரசாங்க தகவல் திணைக்களத்தில் நடைபெற்ற வாராந்திர அமைச்சரவை கூட்ட தீர்மானங்களை அறிவிக்கும் ஊடகவியலாளர் சந்திப்பின் போதே அவர் இதனை குறிப்பிட்டார்.முன்னாள் ஜனாதிபதி ரணில் விக்ரமசிங்க, நுவரெலியா தபால் நிலையத்தை தபால் திணைக்களத்திடமிருந்து நீக்கி, அதை விற்க திட்டமிட்டிருந்தார்.இருப்பினும், தபால் நடவடிக்கைகளைத் தொடர்ந்து மேற்கொண்டு, சுற்றுலாத் தலமாக அந்த இடத்தை மேம்படுத்தும் அதே வேளையில், தபால் அலுவலகத்தைத் திணைக்களத்தின் கீழ் வைத்திருப்பது என்ற புதிய முடிவு எடுக்கப்பட்டுள்ளது என்றும் அவர் கூறினார்.இந்த விவகாரம் தொடர்பாக நீதிமன்ற வழக்கு நடந்து வருகிறது, ஆனால் திருத்தப்பட்ட முடிவை அரசாங்கம் நீதிமன்றத்திற்கு அறிவிக்காது என்று அவர் கூறினார்.