நாட்டில் எரிபொருளுக்கு பற்றாக்குறை இல்லை; இம்மாதம் கப்பல்களும் வந்தடையும் - சபையில் உறுதியளித்த ஜனாதிபதி இலங்கையில் தற்போது எரிபொருளுக்கு பற்றாக்குறை ஏற்படாது என்று ஜனாதிபதி அனுரகுமார திசாநாயக்க உறுதியளித்துள்ளார். பாராளுமன்றத்தில் ஜனாதிபதி  இன்று விசேட உரையாற்றுகையில் அவர் இதனைத் தெரிவித்தார். இது தொடர்பில் அவர் மேலும் தெரிவிக்கையில், இலங்கையில் அடுத்த 33 நாட்களுக்கு போதுமான டீசல் மற்றும் அடுத்த 27 நாட்களுக்கு பெட்ரோல் கையிருப்பில் உள்ளது.மார்ச் 07 அல்லது 08 ஆம்  திகதிகளில் 35,000 டன் பெற்றோல் கொண்ட எண்ணெய் டேங்கர் இலங்கைக்கு வரும் என்று எதிர்பார்க்கப்படுகிறது. சேமிப்பு இருப்பு மற்றும் தற்போதுள்ள எரிபொருள் இருப்புகளின் அடிப்படையில் கப்பல்கள் கொண்டு வரப்படுகின்றன. ஆர்.எம். பார்க்ஸிலிருந்து எரிபொருள் கொண்ட ஒரு கப்பல் மார்ச் 14 ஆம் திகதியும், சினோபெக்கிலிருந்து மார்ச் 14 ஆம்  திகதியும், இந்திய எண்ணெய் நிறுவனம் (ஐ.ஓ.சி) மார்ச் 21 ஆம்  திகதியும், சிலோன் பெட்ரோலியம் கார்ப்பரேஷனிலிருந்து மார்ச் 28 ஆம் திகதியும் வரும் என்று எதிர்பார்க்கப்படுகிறது. அனைத்து கப்பல்களும் ஏற்றப்பட்டுள்ளன. இலங்கையில் தற்போது எரிபொருள் பற்றாக்குறை இல்லை.  இருப்பினும், போர் தீவிரமடைந்தால், அரசாங்கம் அதற்கேற்ப பிரச்சினைகளை கண்காணித்து தீர்க்க வேண்டும். மத்திய கிழக்கில் தற்போதைய மோதலில் ஈடுபட்டுள்ள அனைத்து தரப்பினரும் விரைவில் அமைதியான தீர்வுக்கு உறுதியளிக்க வேண்டும் என்று இலங்கை எதிர்பார்க்கிறது. ஏனெனில் இது இலங்கை உட்பட முழு உலகின் பொருளாதாரத்தையும் போர் பாதிக்கிறது . மத்திய கிழக்கு நெருக்கடியால் இலங்கைக்கு ஏற்படும் பாதிப்புகள் குறித்த அறிக்கையை தொகுப்பதில் இலங்கை மத்திய வங்கி செயல்பட்டு வருகின்றது.  நிதி மற்றும் வெளியுறவு அமைச்சகங்கள் ஏற்கனவே நிலைமையைக் கண்காணித்து, அறிக்கைகளைத் தொகுத்து, பாதிப்பை நிவர்த்தி செய்வதற்குத் தேவையான நடவடிக்கைகளைச் செயல்படுத்தியுள்ளன என்று ஜனாதிபதி  மேலும்  தெரிவித்தார்.