கியூபா குறித்து ரூபியோ கடும் எச்சரிக்கை அமெரிக்க அதிபர் டொனால்ட் டிரம்பின் நிர்வாகம் முடிவடையும் வரை காத்திருந்தால் தற்போதைய நிலைமையைத் தொடர முடியும் என நினைக்கும் கியூபா தலைவர்கள் தவறாகக் கணக்கிடுவதாக அமெரிக்க வெளியுறவு அமைச்சர் மார்கோ ரூபியோ எச்சரித்துள்ளார்.“இந்த நிர்வாகம் முடியும் வரை காத்திருக்கலாம்” என நினைப்பவர்கள் அவ்வாறு காத்திருந்தால் “கடினமான முறையில் பாடம் கற்றுக்கொள்வார்கள்” என ரூபியோ எச்சரிக்கை விடுத்துள்ளார்.கியூபா தற்போதைய அரசியல் பாதையில் இருந்து விலகி வேறு பாதையைத் தேர்வு செய்யும் என அமெரிக்கா நம்புவதாகவும் ரூபியோ தெரிவித்துள்ளார்.இதற்கு முன்னதாக, செப்டம்பர் 23ஆம் தேதி நியூயோர்க்கில் ஐ.நா. பொதுச் சபைக் கூட்டத்துக்கு இடையே பேசிய ரூபியோ, கியூபாவின் அரசியல் மற்றும் பொருளாதார அமைப்பில் குறிப்பிடத்தக்க மாற்றங்கள் தேவை எனக் கூறியிருந்தார்.கியூபா தனது நாட்டை நீண்டகால முன்னேற்றத்தை நோக்கிய பாதையில் மாற்றிக்கொள்ள ஒரு வாய்ப்பு இருப்பதாகவும், அமெரிக்கா அதற்கான நடவடிக்கைகளில் பங்களிக்கத் தயாராக இருப்பதாகவும் அவர் தெரிவித்திருந்தார்.அதேவேளை, கியூபாவில் பல தசாப்தங்களாக நிலவும் அமைப்பை குறுகிய காலத்தில் மாற்றிவிட முடியாது என்றும் ரூபியோ குறிப்பிட்டுள்ளார்.டிரம்ப் நிர்வாகம் கியூபாவின் தற்போதைய அரசை மாற்றும் நோக்கில் அழுத்தங்களை அதிகரித்து வரும் நிலையில், இரு நாடுகளுக்கும் இடையிலான உறவு மீண்டும் பதற்றமடைந்துள்ளது.அமெரிக்காவின் அழுத்தங்களுக்கு மத்தியில், கியூபா வெளியுறவு அமைச்சர் புரூனோ ரொட்ரிக்ஸ், தங்கள் நாடு பேச்சுவார்த்தைக்குத் தயாராக இருப்பதாகத் தெரிவித்துள்ளார். இதனால் வாஷிங்டன்–ஹவானா இடையிலான அடுத்தகட்ட நடவடிக்கைகள் சர்வதேச அளவில் கவனம் பெற்றுள்ளன.