தைவானை நோக்கி நகரும் சக்திவாய்ந்த புயல் ‘சாம்பி’ இந்த ஆண்டின் மிக சக்திவாய்ந்த வெப்பமண்டலப் புயலாகக் குறிப்பிடப்படும் ‘சாம்பி’, தைவான் மற்றும் சீனாவின் கிழக்குக் கடற்கரைப் பகுதிகளை நோக்கி நகர்ந்து வருவதால், அப்பகுதிகளில் அவசரகால முன்னெச்சரிக்கை நடவடிக்கைகள் தீவிரப்படுத்தப்பட்டுள்ளன.மணிக்கு சுமார் 245 கிலோமீற்றர் வேகத்தில் காற்று வீசக்கூடிய இந்தச் சூப்பர் புயல், கடந்த ஒக்டோபர் 21ஆம் திகதி தைவானின் கிழக்குக் கடற்பரப்பை நோக்கி நகர்ந்துகொண்டிருந்ததாகத் தெரிவிக்கப்பட்டது.புயலின் இறுதிப் பாதை தொடர்பில் நிச்சயமற்ற நிலை காணப்பட்டாலும், சீனாவின் தென்கிழக்குக் கடலோரப் பகுதிகளில் பலத்த காற்று, கனமழை மற்றும் வெள்ளப்பெருக்கு ஏற்படக்கூடும் என அதிகாரிகள் எச்சரித்துள்ளனர்.இதையடுத்து, சீனாவின் ஜெஜியாங் மாகாணத்தில் முதியவர்கள், கர்ப்பிணிப் பெண்கள் மற்றும் மாற்றுத்திறனாளிகள் உள்ளிட்ட பாதிக்கப்படக்கூடிய மக்களைப் பாதுகாப்பான இடங்களுக்கு வெளியேற்றுவதற்கான ஏற்பாடுகள் முன்னெடுக்கப்பட்டுள்ளன.மேலும், 36 பயணிகள் படகு வழித்தடங்களின் சேவைகள் இடைநிறுத்தப்பட்டுள்ளதுடன், 223 கடல்சார் கட்டுமானத் திட்டங்களின் பணிகளும் தற்காலிகமாக நிறுத்தப்பட்டுள்ளதாகச் செய்திகள் தெரிவிக்கின்றன.அண்டை மாகாணமான புஜியானில், மீன்பிடிப் படகுகள் பாதுகாப்புக்காகத் துறைமுகங்களுக்குத் திரும்புமாறு அறிவுறுத்தப்பட்டுள்ளன. கடலுக்குள் அமைந்துள்ள கட்டுமானத் தளங்கள் மற்றும் மீன் பண்ணைகளில் பணிபுரியும் தொழிலாளர்களையும் பாதுகாப்பான இடங்களுக்கு அழைத்துச் செல்ல நடவடிக்கைகள் மேற்கொள்ளப்பட்டுள்ளன.முதற்கட்ட முன்னறிவிப்புகளின்படி, சாம்பி புயல் தைவானைக் கடந்து சீனாவின் புஜியான் மாகாணத்தில் கரையைக் கடக்கக்கூடும் என எதிர்பார்க்கப்பட்டது. எனினும், பின்னர் வெளியான முன்னறிவிப்புகளில் புயல் வடகிழக்குத் திசையில் திரும்பி, தைவானின் வடகிழக்குக் கடற்கரையை ஒட்டிச் செல்லக்கூடும் எனக் குறிப்பிடப்பட்டது.இதனால், புயலின் துல்லியமான பாதையைத் தீர்மானிப்பதில் தொடர்ந்து நிச்சயமற்ற நிலை காணப்படுகிறது.இதேவேளை, சீனாவின் முக்கிய நிதி மையமான ஷாங்காய் உள்ளிட்ட நகரங்களிலும் கனமழை மற்றும் பலத்த காற்று வீசக்கூடும் என எச்சரிக்கப்பட்டுள்ளது. ஷாங்காய், ஹாங்சோ, நிங்போ, ஃபுசோ, வென்சோ மற்றும் சியாமென் ஆகிய நகரங்களின் விமானப் போக்குவரத்திலும் இடையூறுகள் ஏற்படக்கூடும் என முன்னெச்சரிக்கை விடுக்கப்பட்டுள்ளது.மோசமான வானிலை தீவிரமடைந்தால், பள்ளிகள், வணிக நிறுவனங்கள், திறந்தவெளி நிகழ்வுகள் மற்றும் பொதுப் போக்குவரத்துச் சேவைகளைத் தற்காலிகமாக நிறுத்துவதற்கும் அதிகாரிகள் தயாராகி வருகின்றனர்.நீடித்த கனமழையால் திடீர் வெள்ளப்பெருக்கு மற்றும் நிலச்சரிவுகள் ஏற்படக்கூடும் என்பதால், வடிகால் அமைப்புகள் உள்ளிட்ட முக்கிய உட்கட்டமைப்புகளும் ஆய்வு செய்யப்பட்டு வருகின்றன.சீனாவின் தேசிய வானிலை மையம், குடியிருப்பாளர்கள் வெளிப்புறக் கட்டமைப்புகளைப் பாதுகாக்கவும், தேவையற்ற பயணங்களைத் தவிர்க்கவும், வெள்ளப்பெருக்கு ஏற்படக்கூடிய மலைப்பகுதிகள் மற்றும் ஆற்றுப் பள்ளத்தாக்குகளிலிருந்து விலகியிருக்கவும் அறிவுறுத்தியுள்ளது.சாம்பி புயல் நேரடியாக நிலப்பரப்பைக் கடக்காவிட்டாலும், அதன் பரந்த காற்றுச் சுழற்சி கடலோரப் பகுதிகளில் அபாயகரமான வானிலையை ஏற்படுத்தக்கூடும் என அதிகாரிகள் எச்சரித்துள்ளனர்.எனவே, புயலின் நகர்வைக் கண்காணித்து வரும் அதிகாரிகள், பாதிக்கப்படக்கூடிய பகுதிகளில் மக்களின் பாதுகாப்பை உறுதிப்படுத்தும் வகையில் முன்னெச்சரிக்கை நடவடிக்கைகளைத் தொடர்ந்து முன்னெடுத்து வருகின்றனர்