புனிதஸ்தலங்களுக்கு வரும் விலங்குகள் கணக்கெடுப்பில் சிவில் பாதுகாப்புத் துறை  புனிதஸ்தலங்கள் உள்ளிட்ட பகுதிகளில் விவசாய பயிர்களை சேதப்படுத்தும் விலங்குகளின் கணக்கெடுப்பை நடத்துவதற்கு சிவில் பாதுகாப்புத் துறையின் ஆதரவு பெறப்பட உள்ளதாக வேளாண்மை அமைச்சகத்தின் பணிப்பாளர் எம்.ஜி. அஜித் புஷ்ப குமார தெரிவித்தார்.நாடு முழுவதும் குரங்குகள், மயில்கள் மற்றும் அணில்கள் போன்ற விவசாய பயிர்களை சேதப்படுத்தும் விலங்குகளின் ஐந்து நிமிட கணக்கெடுப்பு, 15 ஆம் திகதி காலை 8 மணி முதல் காலை 8.05 மணி வரை நடத்த ஏற்பாடுகள் செய்யப்பட்டுள்ளன.புனிதஸ்தலங்களுக்கு அருகில் குரங்குகள் போன்ற விலங்குகள் பொதுவாகக் காணப்படுவதால், இந்த விலங்குகளை எண்ணுவதற்கு சிறப்பு குழுக்கள் நிறுத்தப்படும் என்றும் பணிப்பாளர் கூறினார்.புனிதஸ்தலங்களைச் சுற்றி உணவுகள் மற்றும் பழங்கள் இருப்பதால், அந்த இடங்களில் பறவைகள் ஏராளமாக உள்ளன என்றும்,விலங்குகள் அவற்றின் இயற்கையான சூழலில் இலைகள் மற்றும் கீரைகளைக் கண்டுபிடிப்பதற்குப் பதிலாக அந்த உணவுகளை அனுபவிக்கப் பழகிவிட்டன என்றும் அவர் கூறினார்.விலங்கு கணக்கெடுப்பு தொடர்பான படிவங்கள் தற்போது நாடு முழுவதும் உள்ள மாவட்ட செயலகங்கள் மற்றும் பிரதேச செயலகங்களுக்கு விநியோகிக்கப்பட்டுள்ளதாக அவர் கூறினார்.