நுவரெலியாவில் பாடசாலை வீதி மண்சரிவு அபாயம்-இரண்டு வார விடுமுறை குறித்து சர்ச்சை நுவரெலியா மாநகர சபையின் நிர்வாகக் குறைபாடுகள் காரணமாக, நீர்க்குழாய் உடைந்து ஏற்பட்ட மண் அரிப்பை ஆரம்பத்திலேயே கட்டுப்படுத்தத் தவறியதால் பிரபல தனியார் பாடசாலையொன்றுக்குச் செல்லும் வீதி கடுமையாகச் சேதமடைந்துள்ளதாக நுவரெலியா பாதுகாப்பு அமைப்பு குற்றஞ்சாட்டியுள்ளது. வீதிப் புனரமைப்புப் பணிகளால் பாடசாலைக்கு இரண்டு வாரங்கள் விடுமுறை வழங்கப்பட்டுள்ளதாகவும், இதனால் மாணவர்களின் கல்வி பாதிக்கப்பட்டுள்ளதாகவும் அந்த அமைப்பின் பிரதிநிதிகள் தெரிவித்துள்ளனர்.வீதியிலிருந்த நீர்க்குழாய் உடைந்து மண் அரிப்பு தொடங்கியபோதே அதிகாரிகள் தலையிட்டு பாதுகாப்பு நடவடிக்கைகளை மேற்கொண்டிருந்தால், பாரிய வீதிச் சரிவைத் தவிர்த்திருக்க முடியும் என அமைப்பின் பிரதிநிதிகளான தினேஷ் லங்கா கீகனகே மற்றும் நாலக தினேஷ் ரத்நாயக்க ஆகியோர் கூறினர். ஆரம்பத்தில் ஏற்பட்ட பாதிப்பை உரிய நேரத்தில் கட்டுப்படுத்தத் தவறியதே நிலைமை மோசமடையக் காரணம் என்றும் அவர்கள் குற்றஞ்சாட்டினர்.வீதியைப் புனரமைப்பது அவசியமானது என்றாலும், அதற்காகப் பாடசாலையின் கல்வி நடவடிக்கைகளை நிறுத்துவது நியாயமான தீர்வல்ல எனவும் அவர்கள் தெரிவித்தனர். மாணவர்களின் கல்வி தொடர மாற்று ஏற்பாடுகளைச் செய்வது சம்பந்தப்பட்ட தரப்பினரின் பொறுப்பு என்றும் வலியுறுத்தினர்.விடுமுறைக் காலத்தில் இணையவழிக் கல்வியை முன்னெடுக்கப் பாடசாலை ஏற்பாடு செய்திருந்தபோதிலும், அது வெற்றிகரமாகச் செயற்படவில்லை என அமைப்பின் பிரதிநிதிகள் குற்றஞ்சாட்டினர். அனைத்து மாணவர்களுக்கும் இணைய வசதி, தொழில்நுட்ப உபகரணங்கள் மற்றும் பொருத்தமான கற்றல் சூழல் கிடைப்பதில்லை என்பதால், இணையவழிக் கல்வியை மட்டும் மாற்று ஏற்பாடாகக் கருத முடியாது என்றும் அவர்கள் சுட்டிக்காட்டினர்.இதற்குப் பதிலளித்த நுவரெலியா மாநகர முதல்வர், டிட்வா புயலால் ஆரம்பத்தில் பகுதியளவிலும் பின்னர் முழுமையாகவும் சேதமடைந்த குறித்த பிரதான வீதி மாநகர சபைக்குச் சொந்தமான உள்ளக வீதி எனத் தெரிவித்தார்.வீதியைப் புனரமைப்பதற்காகப் பல மாதங்களாக ஒப்பந்தப்புள்ளிகள் கோரப்பட்டபோதிலும், கடினமான நிலைமைகள் காரணமாக ஒப்பந்தக்காரர்கள் முன்வரவில்லை என்றும், பின்னர் ஒரு நிறுவனம் ஒப்பந்தத்தை ஏற்று கடந்த ஒக்டோபரில் பணிகளை ஆரம்பித்ததாகவும் அவர் கூறினார்.புனரமைப்புப் பணிகளை நிறைவு செய்ய ஒப்பந்த நிறுவனம் மூன்று மாத கால அவகாசம் கோரியுள்ளதாகவும், எதிர்வரும் ஜனவரியில் பாடசாலைகள் மீண்டும் ஆரம்பிக்கும்போது வீதியைப் புனரமைத்து ஒப்படைக்க முடியும் என நம்புவதாகவும் மாநகர முதல்வர் தெரிவித்தார். பணிகள் நடைபெறும் காலத்தில் மாணவர்கள் மாற்று வீதிகளைப் பயன்படுத்திப் பாடசாலைக்குச் செல்ல முடியும் என்றும் அவர் குறிப்பிட்டார்.பாடசாலையைத் தொடர்ந்து நடத்துவதா அல்லது விடுமுறை வழங்குவதா என்பது பாடசாலை நிர்வாகம் எடுக்க வேண்டிய தீர்மானம் என்றும், அதற்குத் தாம் பொறுப்பேற்க முடியாது என்றும் மாநகர முதல்வர் கூறினார். வீதிப் புனரமைப்புக்கான செலவு தொடர்பான குற்றச்சாட்டுகளையும் நிராகரித்த அவர், குறைந்த செலவில் தரமான பணிகளை மேற்கொள்வதே மாநகர சபையின் நோக்கம் எனத் தெரிவித்தார். பொறியியலாளர்கள் மற்றும் தொழில்நுட்ப உத்தியோகத்தர்களின் ஆலோசனை, மேற்பார்வையின் கீழ் பணிகள் முன்னெடுக்கப்படுவதாகவும் அவர் கூறினார்.வீதிச் சரிவுக்கான காரணங்கள் குறித்து முறையான விசாரணை நடத்தி, பொறுப்புக்கூற வேண்டிய தரப்பினரை அடையாளம் காணவும், வீதியை விரைவாகவும் பாதுகாப்பாகவும் புனரமைத்து பாடசாலையின் வழமையான கல்வி நடவடிக்கைகளை மீள ஆரம்பிக்கவும் நடவடிக்கை எடுக்குமாறு நுவரெலியா பாதுகாப்பு அமைப்பின் பிரதிநிதிகள் கோரிக்கை விடுத்துள்ளனர்.