அனர்த்த நிலைமைகளைக் கையாள அரசாங்கத்திற்கு அனுபவமோ, அறிவோ இல்லை மரிக்கார் குற்றச்சாட்டு அனர்த்த நிலைமைகளைக் கையாளவோ அல்லது உரிய இலக்குகளை அடையவோ அரசாங்கத்திற்கு அனுபவமோ, அறிவோ இல்லை. அரசாங்கம் நடைமுறைத் தீர்வுகளை வழங்காமல் வெறும் தற்புகழ்ச்சி பேசுவதையே செய்கிறது என பாராளுமன்ற உறுப்பினர் எஸ்.எம். மரிக்கார் தெரிவித்தார். ஐக்கிய மக்கள் சக்தியின் பிரதான அலுவலகத்தில் இன்று வியாழக்கிழமை  (27) நடைபெற்ற ஊடகவியலாளர் சந்திப்பில் கலந்துகொண்ட பாராளுமன்ற உறுப்பினர் எஸ்.எம். மரிக்கார், அரசாங்கத்தின் செயற்பாடுகள், ஊழல் குற்றச்சாட்டுகள் மற்றும் கட்சியின் எதிர்காலத் திட்டம் குறித்து கருத்து வெளியிட்டுள்ளார்.பாராளுமன்ற உறுப்பினர் எஸ்.எம். மரிக்கார் குறிப்பட்டதாவது, தற்போதைய அரசாங்கத்தில் இருப்பவர்கள் 'வேலை செய்யத் தெரியாதவர்கள்' என்பதை மக்கள் புரிந்துகொண்டுள்ளனர். பல அமைச்சகங்கள் ஒதுக்கப்பட்ட நிதியில் 50%க்கும் குறைவாகவே செலவு செய்துள்ளன.அனர்த்த நிலைமைகளைக் கையாளவோ அல்லது உரிய இலக்குகளை அடையவோ அரசாங்கத்திற்கு அனுபவமோ, அறிவோ இல்லை. அரசாங்கம் நடைமுறைத் தீர்வுகளை வழங்காமல் வெறும் தற்புகழ்ச்சி பேசுவதையே செய்கிறது. அதிக வரிகளை விதித்து அரசாங்கம் திறைசேரியை நிரப்பியிருந்தாலும், டொலர் வருமானத்தை ஈட்டவில்லை. இந்த வருமானம் இந்த ஆண்டு மட்டுமே நீடிக்கும். அடுத்த ஆண்டு பொருளாதார நெருக்கடிகள், வணிகங்களின் வீழ்ச்சி மற்றும் டொலர் கையிருப்பு பற்றாக்குறை ஏற்படும் ஆபத்து உள்ளது.முதலீடுகளை ஈர்க்க அரசாங்கம் சர்வதேச முதலீட்டாளர்களுடன் கலந்துரையாடி, அவர்களுக்கு சலுகைகள் குறித்துத் தெரிவிக்க வேண்டும். இயலாமை இருந்தால் உதவ ஐக்கிய மக்கள் சக்தி தயாராக உள்ளது. "ஒரு ரூபாயைக் கூட திருட மாட்டோம்" என்று கூறிய அரசாங்கம், தற்போது நலன் சார்ந்த முரண்பாடுகள் (Conflict of Interest) கொண்ட சட்டவிரோத நடவடிக்கைகளில் ஈடுபட்டுள்ளது. டிஜிட்டல் பொருளாதார விவகார பிரதி அமைச்சர், தனக்குச் சொந்தமான நிறுவனத்திற்கு அமைச்சகத்தின் கொள்முதல் நடவடிக்கைகளை வழங்கியுள்ளது சட்டவிரோதமானது மற்றும் இது பாரிய மோசடிக்கு வழிவகுத்துள்ளது.ஐக்கிய தேசியக் கட்சியும் (UNP) ஐக்கிய மக்கள் சக்தியும் நிச்சயமாக இணையும். வலதுசாரி சக்திகளின் இணைவை யாராலும் சீர்குலைக்க முடியாது.எதிர்வரும் தேர்தலில் இரு கட்சிகளும் இணைந்தே போட்டியிடும். இரண்டு கட்சிகளும் டி.எஸ். சேனநாயக்கவின் கொள்கைகளைப் பின்பற்றி, மத்திய பாதையில் நாட்டை முன்னோக்கி கொண்டு செல்லும்.புதிய தலைமுறை வாக்காளர்கள் (23%) ஊழலற்ற, அனுபவமுள்ள குழுவை எதிர்பார்க்கிறார்கள். அந்த தலைமை ஐக்கிய மக்கள் சக்தியை முதன்மையாகக் கொண்டது.அரசாங்கத்தைக் கவிழ்ப்பதை விட, அரசாங்கத்தின் மீது கடும் அழுத்தத்தைப் பிரயோகித்து, மக்களுக்கு அளித்த வாக்குறுதிகளை நிறைவேற்றச் செய்வதே ஐக்கிய மக்கள் சக்தியின் நோக்கம்.நாட்டில் நெருக்கடிகளை உருவாக்கி அதிகாரத்திற்கு வரும் ஆசை ஐக்கிய மக்கள் சக்திக்கு இல்லை. ஜனவரி மாதம் முதல் அரசாங்கத்தின் மீது அழுத்தம் கொடுக்கும் வேலைத்திட்டம் ஆரம்பிக்கப்படும் என கருத்துக்களை பாராளுமன்ற உறுப்பினர் எஸ் எம் மரிக்கார் தெரிவித்தார்.